Primeiru-Ministru, Taur Matan Ruak, hasai foto ho Komadante Jerál PNTL, Komisáriu Polísia, Faustino da Costa no ofisiál superiór PNTL. Imajen Tatoli/Eugénio Pereira

DILI, 21 janeiru 2021 (TATOLI)–Komandu Jerál Polísia Nasionál Timor-Leste (PNTL) sei fó graduasaun ba Ofisiál Superiór Polísia na’in-40 resin ne’ebé termina ona sira-nia kursu Diploma Jestaun Ezekutiva Polísia iha Sentru Formasaun Akademina PNTL, Comoro, Dili.

Portavóz Komandu Jerál Polísia Nasionál Timor-Leste, Superintendente Xefe, Arnaldo de Araújo deklara ba Agência Tatoli iha nia knaar fatin, ohin, katak ofisiál superiór PNTL ne’ebé tuir kursu hamutuk ema na’in-46, maibé na’in haat (4) mate ona, no balun hala’o servisu nu’udar adidu polísia nian iha rai-li’ur. Tanba ne’e, polisibilidade ofisiál na’in-40 mak sei simu graduasaun.

Serimónia graduasaun sei hala’o iha aban, sesta (22/01), iha Sentru Formasaun Akademia PNTL, iha-ne’ebé sei partisipa direita hosi Komandante Jerál PNTL, Komisáriu Polisia, Faustino da Costa no ofisiál polísia sira, deputadu Parlamentu Nasionál, membru Governu no korpu diplomátiku sira.

Ofisiál Superiór Polísia hosi munisípiu hahú tuir kursu ne’e iha tinan 2010 no balun termina ona iha tinan 2016 liubá ne’ebé hetan formasaun direta hosi formandu Polísia Austrália.

Molok simu graduasaun, ekipa sira-ne’e sei partisipa uluk selebrasaun misa agradesimentu ne’ebé sei hala’o iha Kapela Sentru Formasaun Polísia Comoro.

Jornalista: Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here