Ministru Finansa, Rui Augostu Gomes, no Prezidente Autoridade RAEOA, Arsénio Paixão Bano, asina protokolu transferéndia orsamentál ba RAEOA, iha salaun MF, Aitarak-laran, kinta (21/01). Imajen/Mídia MF

DILI, 21 janeiru 2021 (TATOLI)–Ministériu Finansa (MF) no Rejiaun Administrativa Espesiál Oé-cusse Ambeno (RAEOA) selebra akordu transferénsia dotasaun orsamentál hosi Governu sentrál ba RAEOA ho montante millaun $29,243.

Nune’e, sei halo transferensia trismestralmente ho montante millaun $7,31.

Orsamentu RAEOA nian ho totál millaun $127, ne’ebé ninia balansu sei rekorre hosi saldo rejiaun ne’e rasik.

“Asina protokolu entre Ministériu Finansa no RAEOA, ne’ebé protokolu ne’e atu fó biban ba Ministériu Finansa atu hahú halo transferénsia osan ne’ebé aprova ona hosi Parlamentu Nasionál ba konta RAEOA,” Ministru Finansa, Rui Augosto Gomes, hateten liuhosi diskursu hafoin asina protokolu ne’ebé hala’o iha salaun MF, Aitarak-laran, kinta ne’e.

Governante ne’e dehan, osan ne’ebé sei transfere millaun $29.243, atu kompleta balansu ne’ebé sei iha Oé-cusse hamutuk millaun $97.757.

Enkuantu orsamentu ba RAEOA iha tinan 2021 hamutuk millaun $127 atu ezekuta iha tinan-ida nia laran, ne’ebé tuir akordu parte rua konkorda halo transferénsia kada fulan tolu.

Iha fatin hanesan, Prezidente Autoridade RAEOA, Arsénio Paixão Bano, kompromete ho ekipa sei utiliza osan sira ne’e hodi dezenvolve rai Oé-cusse ho di’ak liután.

“Ami sei utiliza osan ne’e ho didi’ak tanba ita-nia misaun atu halo Timor-Leste ne’e sai rai ida ho objetivu klaru hodi hasai povu hosi kiak,” tenik Arsénio.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here