Diretór Nasionál Patrimóniu Lojístika no Informátika, Manuel de Jesus dos Santos. Imajen/Tomé Amado.

DILI, 21 janeiru 2921 (TATOLI)—Ministériu Edukasaun Juventude no Desportu (MEJD) liuhosi Diresaun Nasionál Patrimóniu Lojístika no Informátika (DNPLI), distribui ona máskara no sabaun ba estudante hamutuk 57.078 iha munisípiu Bobonaro no Covalima, iha kinta ne’e.

“Ohin ita nia ekipa arranka ona bá munisípiu Bobonaro no Covalima atu halo distribuisaun máskara no sabaun ba estudante hamutuk 57.078,” Diretór Nasionál Patrimóniu Lojístika no Informátika, Manuel de Jesus dos Santos  hato’o asuntu ne’e iha knaar fatin Vila Verde.

Notísia Relevante:Semana oin, MEJD distribui máskara bá munisípiu haat

Mekanizmu distribuisaun ne’e, DNPLI fahe kada estudante hetan máskara ida no kada eskola hetan sabaun 15.

Diretór ne’e esplika, númeru estudante ne’ebé iha ona meza DNPLI ho totál 78.357 kompostu hosi munisípiu tolu hanesan Maliana, Covalima no Liquiçá, maibé parte diresaun foin mak distribui ba munisíu rua, no tuir planu sei kontinua distribui ba estudante sira iha munisipiu Liquiçá iha segunda 25 janeiru.

Entretantu, totál dadus estudante hosi munisípiu tolu ne’ebé DNPLI rejista, kompostu hosi munisípiu Bobonaro hamutuk 35.536 mai hosi eskola ensinu pré-eskolár to’o ensinu sekundáriu jerál, inklui eskola privada no Katólika hamutuk 218.

Númeru estudante hosi munisípiu Covalima hamutuk 21.542 ho totál eskola 128 no munisípiu Liquicá iha estudante hamutuk 21.279 ho totál eskola 108.

Jornalista: Tomé Amado

Editór: Cipriano Colo

HAKEREK NO HATÁN

Please enter your comment!
Please enter your name here