DILI, 21 janeiru 2021 (TATOLI)—Prezidente Autoridade Rejiaun Administrativa Espesiál Óe-cusse Ambeno (RAEOA) no Zona Espesiál Ekonomia Sosiál Merkadu, Timor-Leste (ZEESM,TL), Arsénio Paixão Bano, hateten daudaun ne’e Governu sentrál halo hela prosesu hodi apoia foos ba Oé-cusse.
“Kona-ba hahán Primeiru-Ministru mós hateten ba ami atu prepara kondisaun, Oé-cusse atu hetan foos tonelada 3.000 ne’ebé daudaun Governu sentrál prosesa hela hodi apoia ami,”Prezidente Autoridade, informa hafoin ramata enkontru ho Primeiru-Ministru (PM), Taur Matan Ruak, iha Palásiu Governu, kinta ne’e.
Daudaun ne’e populasaun sosa nesesidade bázika hosi Dili transporta ho ró bá Óe-cusse.
Biban ne’e, nia husu povu Oé-cusse poupa hahán iha ámbitu prevensaun COVID-19 iha Timor-Leste.
“Loos duni katak hahán nia folin sei sa’e ho risku katak hahán sei menus, maibé ami halo esforsu hotu. Ha’u apelu ona ba povu Oé-cusse katak ita labele hein de’it Governu sentrál atu ajuda ita maibé ema hotu tenke komesa poupa hahán iha uma tanba ita lahatene situasaun COVID-19 ne’e to’o bainhira,” Prezidente Autoridade RAEOA fó hanoin.
Nune’e mós, parte autoridade apela ba povu Oé-cusse atu nafatin kuidadu-an hosi COVID-19, tanba kazu konfirmadu iha Timór Osidentál aumenta ba bebeik.
“Opsaun seluk atu evita moras ne’e labele tama maka hotu-hotu tenke serbisu hamutuk hodi labele halo pasajen ilegál bá mai fronteira no rezolve hahán iha rai rasik,” nia akresenta.
Jornalista: Antónia Gusmão
Editora: Julia Chatarina
