Portavós Komandu Jerál PNTL, Superintendente Xefe, Arnaldo de Araújo. Imajen Tatoli/Eugénio Pereira

DILI, 21 janeiru 2021 (TATOLI)–Komandu Jerál Polísia Nasionál Timor-Leste (PNTL) durante loron neen (6) nia laran hahú hosi 15-20 janeiru 2021, rejista kazu krime hamutuk 50 resin ne’ebé akontese iha territóriu Timor-Leste.

Portavóz Komandu Jerál PNTL, Superintendente Xefe, Arnaldo de Araújo relata, tuir relatóriu estatístika rejista kazu 50 resin ne’e kompostu hosi violénsia doméstika 12, asalta-malu 11, baku-malu simples 10, ameasa-malu 4, krime fíziku simples 15, tuda-malu entre grupu iha 2 no kazu estraga fasilidade públiku 1.

Hosi totál kazu hirak-ne’e, parte Servisu Investigasaun PNTL nian prosesa ona, aprezenta autór sira ba Ministériu Públiku hodi prosesa tuir lei.

Arnaldo akresenta, PNTL rejista mós kazu asidente motór monu no karreta soke hamutuk 40 ne’ebé vítima na’in-24 kanek kamaan no na’in 5 sofre kanek todan.

Komandu PNTL mós rejista durante períodu Estadu Emerjénsia (EE) hahú hosi 03-20 janeiru 2021, Unidade Espesiál Polísia (UPF) konsege detein komunidade hamutuk 76 kompostu feto 18, mane 58 no estranjeiru na’in 3, mak hala’o viajen ilegál hosi Atambua‐Indonézia mai Timor-Leste liuhusi fronteira Bobonaro, Covalima no Oé-Cusse.

Ema hirak-ne’e parte UPF detein hodi entrega ba ekipa COVID-19 Ministériu Saúde hodi hela iha kuarentena Covalima, Batugade no Oé-Cusse inklui transporta ba Dili.

Nia hatutan, tuir lei, sidadaun sira ne’ebé tama ilegál kumpre tiha kuarentena, PNTL sei prosesu ba Ministériu Públiku, tanba sira kontra EE dasiak ne’ebé abranje iha territóriu nasionál tomak, hahú vigora hosi tuku 00:00 loron 03 janeiru 2021 no sei termina tuku 23:59 loron 01 fevereiru 2021.

Jornalista: Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here