Deputadu Abel Pires. Imajen Tatoli/Egas Cristovão.

DILI, 21 janeiru 2021 (TATOLI)–Deputadu Abel da Silva Pires eleitu sai Prezidente Grupu Joven Parlamentár ba períodu 2020-2021.

Grupu Joven Parlamentár konstitui ona meza iha loron kuarta, 20 janeiru 2021, liuhosi reuniaun entre membru grupu sira.

Iha aprezentasaun kandidatura iha lista rua mak hanesan; lista dahuluk, Deputadu Abel da Silva Pires hanesan Prezidente, Deputadu António de Sá Benevides hanesan Vise-Prezidente no Deputada Nélia Soares Menezes hanesan sekretária.

Lista daruak, Deputadu Abel da Silva Pires hanesan Prezidente, Deputadu José Virgílio Rodriguês Ferreira hanesan Vise-Prezidente no Deputada Irene Gonzaga Sarmento hanesan Sekretária.

Hosi lista rua ne’e, lista daruak mak hetan votu 7 kompara ho lista dahuluk hetan votu 5.

Nune’e liuhosi eleisaun sekreta ba kompozisaun meza Grupu Joven Parlamentár ne’e Deputadu Abel da Silva Pires mak eleitu nu’udar Prezidente, Deputadu José Virgílio Rodriguês Ferreira nu’udar Vise-Prezidente no Deputada Irene Gonzaga Sarmento nu’udar Sekretária.

Reuniaun ne’e rasik hetan abertura hosi Prezidente Parlamentu Nasionál, Deputadu Aniceto Longuinhos Guterres Lopes.

Prezidente Grupu Joven Parlamentár, Deputadu Abel da Silva Pires, esplika grupu ne’e bazea ba rezolusaun ne’ebé aprova iha plenária Parlamentu Nasionál iha tinan hirak liubá.

Nia dehan, parlamentu iha grupu rua, ida mak GMPTL ba asuntu feto no ida nia lidera ne’e ba asuntu joventude.

“Kona-ba asuntu joven nian iha programa boot rua. Ida, atu promove partisipasaun joven iha polítika no ida fali mak atu defende interese juventude nian,” Prezidente Grupu Joven Parlamentár informa ba Agência TATOLI, kinta ne’e.

Nia dehan, sei halo observasaun ba joventude sira hodi promove iha polítika no defende interese juventude nian iha kualkér atividade parlamentár.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here