Masakre 6 setembru 1999 iha Suai. Imajen/Espesial.

DILI, 21 janeiru 2021 (TATOLI)—Diretór Ezekutivu Centro Nacional Chega (CNC), Hugo Maria Fernandes, hateten tinan ne’e CNC planu atu halo komemorasaun ba eventu istóriku 12 iha territóriu Timor-Leste no hahú hosi CNC nia mandatu to’o ohin loron sira hala’o ona komemorasaun hamutuk 50-resin.

Notísia Relevante: Setembru ne’e, CNC sei komemora eventu istóriku iha munisípiu rua

“Tinan ne’e, CNC sei halo komemorasaun ba eventu istóriku hamutuk 12 iha munisípiu sira hotu-hotu. Maibé, hosi CNC hahú nia mandatu iha 2017 to’o ohin loron ne’e, CNC halo ona komemorasaun ba eventu istóriku sira-ne’e hamutuk 50-resin,” Hugo Maria Fernandes hateten ba Agência TATOLI iha nia knaar fatin, Antigu Komarka, Balide, Dili, kinta ne’e.

 Nia argumenta, komemorasaun eventu istóriku 12 ne’ebé sei hala’o ne’e mesak foun no la siginifika eventu ne’e foin akontese maibé akontese tinan barak ona maibé CNC foin mak iha planu atu komemora hodi esplika no fó hanoin ba komunnidade sira.

“Ita seidauk identifika fatin ba komemorasaun ne’e maibé kuaze selebra hotu iha munisípiu ida-idak inklui Rejiaun Administrativa Espesiál Oé-Cusse Ambeno (RAEOA),” nia dehan.

Komemorasaun eventu istóriku ne’e, nai dehan, la’ós ba ema Indonézia sira halo aat timoroan sira maibé mós ba funu entre maun-alin ne’ebé akontese iha Timor-Leste. Komemorasaun ne’e, tuir nia, sempre iha efeitu rekonsiliasaun tanba liuhosi komemorasaun refere mak ema balun husu deskulpa ba malu no balun hato’o agradesimentu tanba bele hatene loloos istória rasik.

“Komemorasaun ne’ebé mak ita hala’o ne’e sempre iha nia efeitu rekonsialiasaun. Tanba ne’e mak ita hala’o no introdús ba komunidade sira katak akontesementu hirak ne’e hakerek ona iha relatóriu CAVR ‘Chega!’ nia laran,” nia hateten.  

Nia hatutan, iha tinan kotuk maske ho situasaun COVID-19 no Dotasaun Orsamentál Temporária, CNC konsege halo komemorasaun ba fatin istóriku hamutuk 18 iha Timor-Leste laran tomak.

“Hosi komemorasaun 18 ne’e, hala’o iha Rotutu Same nian no seluk tan. Tanba, iha relatóriu CAVR “Chega!” hakerek mós kona-ba levantamentu Rotutu maibé tinan naruk ema barak lahatene. Entaun, liuhosi komemorasaun ida-ne’e mak ema bele hatene. Ita iha ona livru kona-ba eventu istórikusira-ne’ebé akontese iha ita-nia rain maibé livru boot,” nia dehan.

Jornalista: Osória Marques

Editor: Cancio Ximenes

HAKEREK NO HATÁN

Please enter your comment!
Please enter your name here