Ekipa selesaun nasionál U-19 hala'o hela preparasaun. Imajen Tatoli/Hortençio Samchez

DILI, 21 janeiru 2021 (TATOLI) – Selesaun nasionál Timor-Leste kompostu hosi U-15, U-16, U-18, U-19 no senior sei hetan oportunidade hodi partisipa iha eventu internasionál tolu hanesan Suzuki Cup, AFF no Sea Games ne’ebé sei halo iha rejiaun Ázia iha tinan ida ne’e.

“Tuir kalendáriu ne’ebé mak iha tinan ida ne’e ekipa nasionál  sei partisipa iha eventu tolu, ekipa senior sei partisipa iha Sea Games no Suzuki Cup, maibé ba iha jogu AFF nian jogadór hosi U-15 to’o U-19,” asistente treinadór Selesaun Nasionál, Francisco de Araújo, informa ba Agéncia TATOLI, ohin, iha Kampu Federasaun Futeból Timor-Leste (FFT), Bairru Formosa, Dili.

Notísia Relevante : Selesaun Nasionál U-19 Prepara An ba AFF Cup

Nia dehan, kalendáriu fiksu ba jogu AFF iha ona no konvite parte AFF manda ona mai Federasaun Futeból Timor-Leste  (FFTL)  no jogu sei hahú iha jullu no kalendáriu tentativa ba Suzuki Cup halo iha abríl, enkuantu Sea Games kalendáriu seidauk anunsia sai.

“Kalendáriu ita iha ona, AFF nian iha jullu, Suzuki Cup nian ba senior sei halo iha abríl, mais seidauk hatene ita ba joga ne’e sei tuir play of ka tama direita, ba Sea Games nian mak seidauk anunsia sai, jogu hotu sei hala’o de’it iha Indonézia, maibé ita mós sei haree ba propagasaun Covid-19 karik númeru tun posibilidade ita sei ba,”  hateten Francisco de Araújo.

Nia hatutan, ba selesaun nasionál senior hahú hosi fulan hirak ba kotuk hala’o treinamentu jogadór hamutuk na’in-60 resin, maibé halo selesaun dala tolu tuituir malu hetan ona jogadór ne’ebé iha valor ka joga di’ak na’in-30 kompostu hosi guarda rede na’in-neen no jogadór na’in-24.

Notísia Relevante : 2019, AFC-AFF-FIFA haraik osan ba FFTL $1,933,815.90

U-15 to’o U-19, tuir nia, daudauk ne’e sei iha faze selesaun hosi treinadór nune’e bele hili jogadór ne’ebé joga di’ak hodi bele reforsa ekipa. Maibé, kada ekipa sei presiza jogadór hamutuk 24.

Haree ba tempu ne’ebé besik ona treinamentu ba jogadór hirak ne’e kontinua lao nafatin, maibé kontinua tuir regra saúde públiku nian ho baze distánsia sosiál.

Jornalista   : Hortencio Sanchez

Editór        : Francisco Simões

HAKEREK NO HATÁN

Please enter your comment!
Please enter your name here