Primeiru-Ministru, Taur Matan Ruak konvoka reuniaun Prezidente RAEOA-ZEESM,TL, Arsénio Paixão Bano. iha Palásiu Governu, kinta (21/01). Imajen TATOLI/Egas Cristovão

DILI, 21 janeiru 2021 (TATOLI)Prezidente Autoridade Rejiaun Administrativa Espesiál Oé-cusse Ambeno (RAEOA), Arsénio Paixão Bano, hateten hahú loron 01 to’o 07 fevereiru 2021 sei realiza screening masál iha Oé-cusse.

“RAEOA tenke preparadu tanba populasaun tomak tenke hetan hotu screening”, Prezidente Autoridade ne’e relata ba jornalista sira, hafoin ramata enkontru ho Primeiru-Ministru, Taur Matan Ruak, iha Palásiu Governu, kinta ne’e.

Daudaun ne’e, ekipa sira prepara hela kondisaun hotu hanesan kuarentena no planeia ona atu sosa ekipamentu protesaun ba ekipa liña frente hanesan ventiladór no oksijéniu.

Aleinde ne’e, Autoridade RAEOA prepara hela kuarentena iha pontu entrada sira hamutuk kuartu 56 no balun sei iha prosesu konstrusaun.

Bainhira vasina prevensaun COVID-19 to’o ona Timór, Arsénio hakarak husu Governu sentrál atu tau prioridade ba Oé-cusse.

“Populasaun iha ne’e hamutuk 85.000, kuandu iha ona vasina ha’u hanesan Prezidente Autoridade sei husu Oé-cusse tama prioridade no suku sira iha fronteira tenke asesu uluk ba vasina,” dehan Prezidente Autoridade.

Biban ne’e, nia apela ba populasaun sira iha área fronteira atu labele simu ema tama ilegál no karik hetan, tenke halo koordena ho autoridade serbisu saúde nune’e bele lori kedas ema ilegál ne’e tama kuarentena ne’ebé preparadu.

“Labele rejeita  timor-oan sira, liuliu Oé-cusse oan sira tama mai tanba bainhira rejeita sira atu bá fali ne’ebé? tanba ne’e maka kuandu tama ilegál ona tenke koopera ho ekipa saúde no autoridade seguransa hodi la’o tuir protokolu saúde públika,” nia fó hanoin.

Arsénio kompromete sei lahalo diskriminasaun ba sidadaun ne’ebé mak hakarak tama liuhosi fronteira terrestre RAEOA, maibé tenke kumpre medida prevensaun, nune’e labele lori komunidade ba risku.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here