Ministra Negósiu Estranjeiru no Kooperasaun, Adaljiza Albertina Xavier Reis Magno. Imajen TATOLI/Egas Cristóvão

DILI, 20 janeiru 2021 (TATOLI) – Ministra Negósiu Estranjeiru no Kooperasaun (MNEK), Adaljiza Albertina Xavier Reis Magno, hateten Governu Timor-Leste husu halo adiamentu ba graduasaun Timor-Leste sai nu’udar país sub-dezenvolvidu iha dezenvolvimentu tanba kestaun ekonomia iha rai-laran seidauk preparadu.

“Ita mak hakarak adia ba tinan-tolu oin mai tanba ekonomikamente ita seidauk preparadu loloos tanba reseita ita nian ne’e sei depende ba mina-rai. Haree mós ba ita-nia kiak sei barak, ma-nutrisaun mós sei barak, entaun ita sei hadi’a lai asuntu sira ne’e,” informa Ministra Adaljiza Albertina Xavier Reis Magno ba Agéncia Tatoli, ohin, iha Palacio do Governo, Dili.

Notísia Relevante : TL toma nota ba komentáriu-sira iha enkontru virtuál EAC

Nia dehan, razaun ida tan mak haree ba Timor-Leste nia diversifikasaun ekonomia seidauk implementa loloos.

Durante tinan-tolu, Ministra Adaljiza Magno, hateten Timor-Leste sei foku liubá haree no hadi’a ekonomia bázika hodi implementa loloos diversifikasaun ekonomia hanesan hasae reseita doméstika sira alende mina.

“Sira husu dala rua ona atu ita gradua, maibé ita rasik mak husu atu adia no haree tok tinan tolu mai oin ne’e, se ita prontu ona mak ita foin gradua,” Ministra Adaljiza Magno hateten.

Jornalista   : Hortencio Sanchez

Editór        : Francisco Simões

 

HAKEREK NO HATÁN

Please enter your comment!
Please enter your name here