Ministru Edukasaun Juventude no Desportu, Armindo Maia. Imajen TATOLI/Egas Cristovão

DILI,20 janeiru 2021 (TATOLI)Ministériu Edukasaun Joventude no Desportu (MEJD), iha posibilidade atu kontinua suspende prosesu aprendizajen ba eskola sira iha área fronteira, bainhira seidauk iha kondisaun.

“Atu re-ativa eskola sira iha fronteira, ita presija estuda didi’ak lai. Karik eskola sira iha ne’ebá mak seidauk iha kondisaun, ita labele obriga,” Ministru Edukasaun Joventude no Desportu, Armindo Maia hato’o asuntu ne’e ba jornalista sira iha Palásiu Governu, kuarta ne’e.

Governante ne’e hatutan, maski Governu iha planu atu suspende aula prezensiál tanba lakohi foti risku, maibé sei kontinua halo monitorizasaun atu bele akompaña nafatin novidade no kondisaun eskola sira iha fronteira.

Hosi rezultadu monitorizasaun ne’e, nia dehan, MEJD sei relata hikas ba Konsellu Ministru (KM) atu bele konsidera hodi foti desizaun.

Armindo Maia mós rekoñese katak, eskola barak seidauk hahú aula prezensiál tanba iha hela periúdu inskrisaun, maibé  Governante ne’e husu atu hotu-hotu hahú aula normál iha segunda 25 janeiru, eseptu eskola sira iha fronteira.

Antes ne’e, MEJD liuhosi Diresaun Nasionál Patrimóniu Lojístika no Informátika fó sai ona kompromisu katak, sei distribui máskara 67.000 ba eskola sira iha munisípiu haat ne’ebé pertense ba liña fronteira hanesan Bobonaro, Suai, Oe-cusse no Liquiça, atu fasilita estudante sira iha aula prezensiál.

Jornalista: Tomé Amado

Editór: Cipriano Colo

HAKEREK NO HATÁN

Please enter your comment!
Please enter your name here