Xefe Estadu Maiór F-FDTL, Majór Jenerál Lere Anan Timur. Imajen Tatoli/Egas Cristovão

DILI, 20 janeiru 2021 (TATOLI)–Xefe Estadu Maiór FALINTIL-Forsa Defeza Timor-Leste (F-FDTL), Majór Jenerál Lere Anan Timor, ohin, hala’o enkontru ho Prezidente Repúblika (PR), Francisco Guterres Lú Olo hodi diskute mekanizmu reforsa vizilánsia seguransa PNTL no F-FDTL iha liña fronteira terrestre no tasi.

Komandante Lere rasik preokupa kona-ba populasaun sira ne’ebé kontinua halo atividade hakat ilegál tama-sai fronteira terrestre.

Iha enkontru ne’e, Lere aprezenta mós ba Xefe Estadu kona-ba situasaun seguransa rai-laran ne’ebé la mosu kazu krime grave ruma.

“Ami trata asuntu lubuk ida. Primeiru, kona-ba situasaun seguransa. Laiha konflitu, distúrbiu, sunu uma no oho malu. Segundu, ko’alia kona-ba prevensaun Covid-19. Ita hotu hatene katak dezde Estadu deklara Estadu Emerjénsia ba dasiak, to’o agora ema seidauk mate. Maibé, ita rejista nafatin ema ilegál tama-sai fronteira maka’as liu,” Lere ba jornalista iha Palásiu Prezidente Nicolau Lobato, Bairru Pité, Dili.

Atu prevene ema tama-sai ilegál hodi evita COVID-19 hosi nasaun seluk, Komandu F-FDTL koopera nafatin ho Unidade Polísia Fronteira (UPF), Unidade Espesiál Polísia (UEP), Unidade Polísia Marítima (UPM), hodi halo seguransa másimu iha fronteira terrestre no tasi iha Batugade, Nunura-Maliana, Covalima no Oé-Cusse.

“Ita tenke reforsa seguransa fronteira ninian. Ita taka fronteira no aeroportu ne’e loos ona, maibé ha’u bele dehan liña fronteira ne’e luan no naruk, tan ne’e difísil kontrola. Maski nune’e, PNTL no F-FDTL tuur hamutuk ona hodi reforsa tan pozisaun iha fronteira,” nia hateten.

Tuir dadus ne’ebé Majór Jenerál Lere simu hahú hosi loron 02 to’o 20 janeiru 2021, autoridade seguransa detein sidadaun hamutuk na’in-31 mak hakat ilegál hosi fronteira Atambua-Indonézia mai Timor-Leste.

“Durante loron 02 jeneiru to’o agora ema tama ho ilegalmente hamutuk 31 mak tama kuarentena iha Batugade no na’in tolu konsege halai sai mai hamutuk ho família no foin daudaun mak kaptura,” Lere informa.

Lere husu atu kualker sidadaun ne’ebé hakat ilegál hosi fronteira ba hela subar iha família iha Timor, tenke kaptura atu kumpre regra (hela iha kuarentena) hodi evita transmisaun lokál moras COVID-19.

Nia mós husu ba Governu tenke barani fó sansaun administrativa ba sidadaun sira ne’ebé tama ilegál no tenke hela iha kuarentena.

“Ita labele halimar ho COVID-19 ne’e. Dalaruma polítiku sira mak halimar fali ho Covid-19. Polítiku sira mak dehan politiza, no ema sira ko’alia polítika ne’e matan delek, tilun diuk no la akompaña mundu,” Lere preokupa.

Veteranu rezisténsia tinan 24 ne’e alerta ba líder polítiku sira no sidadaun sira atu hotu-hotu tenke kumpre regra Estadu Emerjénsia hodi luta hasoru propagasaun surtu COVID-19.

Antes ne’e, Komandante Jerál PNTL, Komisáriu Polísia Faustino da Costa iha segunda (18/01), vizita Munisípiu Bobonaro hala’o enkontru ho Prezidente Autoridade Bobonaro hodi diskute mekanizmu hametin lutu seguransa, tanba nasaun viziñu Atambua-Indonézia sofre moras COVID-19 ho númeru ne’ebé aas.

Jornalista: Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here