Imajen karikatura Google

DILI, 20 janeiru 2021 (TATOLI)–Ekipa Diresaun Nasionál Servisu Migrasaun  (DNSM), kuarta ne’e, deporta Xineza ida, tanba hela iha Timor-Leste lakohi kontribui selu taxa ba Estadu.

Xineza ne’ebé ho naran Wang Yanmei (46) durante ne’e hala’o ninia atividade loke negósiu massage iha área Praia dos Coqueiros, Dili.

Komandante Setór Operasaun Servisu Migrasaun, Inspetór Polísia Luís do Carmo Pereira deklara Xineza Wang Yanmei hahú mai servisu iha Timor-Leste iha 02 marsu 2015.

Sidadaun ne’e, parte Migrasaun detein no aprezenta nia kazu ba Ministériu Públiku hodi hala’o julgamentu iha Tribunál Distritrál Dili, no desizaun sai iha 29 outubru 2020 tenke deporta ba nia rain.

“Nia loke massage (komu-isin) iha Praia dos Coqueiros, la selu taxa ba ita-nia Estadu. Entaun, ami prosesu ba iha tribunál, no desizaun sai ita tenke deporta nia,” Luís ba jornalista iha Aeroportu Internasionál Prezidente Nicolau Lobato, Comoro, Dili.

Nia haktuir, tuir loos, Migrasaun deporta sidadaun ne’e iha tinan 2020 liubá, maibé tanba fronteira Timor-Leste taka, nune’e hein to’o aeroportu internasionál loke, ohin foin halo prosesu deporta nia fila ho aviaun Malaysia Airlines.

Tuir planu, Migrasaun sei halo operasaun inklui fasilita traballadór estranjeiru sira ne’ebé uza vistu turista servisu iha Timor-Leste bele halo renovasaun ba sira nia vistu turista ba vistu traballu, inklui fasilita trata vistu estadia temporária, no vistu autorizasaun rezidénsia.

Jornalista: Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here