PNTL detein hela Arguido CDJ ne'ebè lori motor tenta soke aviaun Sriwijaya iha Aeroportu Internasionál Prezidente Nicolau Lobato, Dili, Segunda (14/10/2019). Imajen/Eugenio Pereira

DILI, 20 janeiru 2021 (TATOLI)-Tribunál Distritál Dili (TDD) liuhosi desizaun koletivu juis aplika medida internamentu  ba arguidu Cristovão de Jesus ne’ebé  antes ne’e  lori motór tenta atu soke aviaun iha aeroportu internasionál Prezidente Nicolau Lobato, Dili.

Kazu ne’e akontese iha  loron  14 outubru 2019, tuku 13:45 Otl,  bainhira arguidu tama iha pista aeroportu nian kondús motor tenta atu soke aviaun Sriwijaya.

Ministériu Públiku (MP) akuza arguidu ho krime atentadu kontra seguransa transporte iha aeroportu ne’ebé previstu iha artigu 210 kódigu penál.

Notísia Relevante : MTK Relata Kronolojia Suspeitu Lori Motór Tenta Xoke Aviaun ba KM

Tuir notifikasaun Tribunál nian ne’ebé sai  iha loron 05 janeiru 2021, katak  krime ne’ebé arguidu komete   provadu objetivu, maibé  parte subjetividade la prova tanba akontesimentu arguidu ho situasaun  moras mental  katak arguidu halo krime  nia hanoin ne’e di’ak.

Prova hosi rezultadu teste hosi peritu doutór iha Ospitál Nasionál Guido Valadares (HNGV) konfirma mós  kondisaun arguidu ho  moras  metal  psikoze agúdo (aas). Tribunál dúvida no fiar rezultadu teste médiku ho ida  ne’e Tribunál aplika medida internamentu ho  suspensaun másimu durante  tinan-tolu ne’ebé previstu iha artigu 99  kódigu penál hodi arguidu  bele livre kontrola nia saúde iha li’ur atu bele rekupera nia saúde.

Tribunál mós husu arguidu atu halo tratamentu regulármente iha sentru saúde Ermera.

Notísia Relevante : Defeza Arguido Atu “Soke Aviaun” Fó Sala Seguransa Aeroportu

Tuir informasaun ne’ebé, ohin, Agéncia TATOLI i asesu hosi TDD katak prosesu ne’e  tranzitu-julgadu ona no lokraik ne’e sei hasai despaxu TDD   iha kinta 21 janeiru 2021, bele livre sai ona hosi prizaun preventiva iha prizaun Gleno hodi fila-fali ba uma.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here