Prezidente Komisaun A PN, Joaquim dos Santos. Imagen Antonio Goncalves.

DILI, 20 janeiru 2020 (TATOLI)–Komisaun A (Justisa no Konstitusionál) iha Parlamentu Nasionál (PN) prioritiza proposta-lei importante tolu atu debate ho urjénsia.

“Lei tolu ne’e mak ami konsidera urjenti, dentru semana ne’e ami atu haruka ba Parlamentu Nasionál. Aban ami hahú diskute no aprova relatóriu no paresér,” Prezidente Komisaun A, Deputadu Joaquim dos Santos “Boraluli”, hateten ba jornalista sira iha resintu Parlamentu Nasionál, kuarta ne’e.

Deputadu Bankada FRETILIN ne’e esplika, proposta lei dahuluk mak autoriza Governu atu halo dekretu lei kona-ba atu altera matéria lejizlasaun prosesu kódigu sivíl nian.

Proposta lei daruak, nia hateten, mak fó autorizasaun ba Governu atu kria dekretu-lei no kria rejime ba administrasaun públika.

Proposta lei datoluk, nia informa, mak autoriza Governu kria rejime jurídiku nune’e hasai rezolusaun atu Timor-Leste adere ba konvensaun Nova Iorke liga ho direitu arbitrajen disputa internasionál iha área komersializasaun.

Prezidente Komisaun A ne’e hateten, dentru semana ne’e sei submete ba Parlamentu Nasionál tanba lei ne’e importane.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here