Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, segunda (20/01). Imajen TATOLI/Egas Cristovão

DILI, 20 janeiru 2021 (TATOLI)–Governu liuhosi Konsellu Ministru (KM) analiza projetu proposta-lei alterasaun dahuluk ba lei númeru 7/2009, loron 15 fulan-jullu, ne’ebé kria Komisaun Funsaun Públika (KFP), ne’ebé aprezenta hosi Ministru Prezidénsia Konsellu Ministru, Fidelis Manuel Leite Magalhães.

“Iha apresiasaun pozitivu tebes no diskusaun mosu kona-ba proposta refere, ne’ebé sei fó tempu ba membru Governu sira hodi bele haree ho didi’ak tanba lei importante ida ne’ebé antes ne’e pasa lalais de’it sein hanoin klean,” Ministru Fidelis relata hafoin ramata reuniaun ezekutivu iha Palásiu Governu, kuarta ne’e.

Proposta alterasaun ne’e sei kontinua halo análiza hodi halo deliberasaun iha sorumutuk Konsellu Ministrus tuirmai.

Alterasaun ne’e bazeia iha ámbitu reforma administrasaun públika ho objetivu hadi’ak maneira jere setór públiku no ninia funsionamentu no halo setór públiku bele efisiente no efikáz liután.

Programa reforma administrativa iha komponente barak, ne’ebé komponente ida mak atu haree ba funsionamentu KFP, tanba ne’e presiza alterasaun.

KFP harii iha tinan 2009 no estabelese atu reforsa kapasidade administrasaun públika no garante katak setór públiku bazeia ba méritu no tuir modelu profisionál ne’ebé aas atubele fó ba povu servisu ne’ebé iha kualidade, efisiente, hodi garante jestaun dezempeñu ne’ebé ekonómika no efetiva.

Komisaun ne’e mós jere Sistema Informasaun no Jestaun Pesoál nian (PMIS), iha baze-dadus ida ne’ebé importante ho informasaun pesoál no profisionál ba funsionáriu públiku sira hotu ho loloos.

Daudaun ne’e totál funsionáriu públiku hamutuk 32.000, ne’ebé dezde tempu VI Governu Konstitusionál, hahú hapara rekrutamentu funsionáriu permanente sira no hahú ona haree filafali kuadru jurídiku, tama mós Lei Funsaun Públika no estatutu Funsaun Públika, hamutuk ho KFP no dirijente sira área rekursu umanu sira.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here