Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, segunda (20/01). Imajen TATOLI/Egas Cristovão

DILI, 20 janeiru 2021 (TATOLI)Liuhosi reuniaun Konsellu Ministru (KM), Governu delibera atu propoin Prezidente Repúblika (PR), Francisco Guterres ‘Lú Olo’, halo renovasaun Estadu Emerjénsia ba da-sanulu, ho períodu loron-30.

EE faze da-siak abranje iha territóriu nasionál tomak, hahú vigora hosi tuku 00:00 loron 03 janeiru 2021 no sei termina tuku 23:59 loron 01 fevereiru 2021.

Tuir Ministru Prezidénsia Konsellu Ministru, Fidelis Manuel Leite Magalhães, ezekutivu sira foti fali inisiativa ne’e tanba haree ba mudansa situasaun epidemiolójika no proliferasaun kazu rejistadu kontájiu COVID-19 nian iha nível rejionál no mundiál.

“Tanba ne’e ita presiza evita risku propagasaun, atu nune’e bele proteje saúde públika no iha kbiit atu hatán ba Sistema Nasionál Saúde. Governu propoin ba Prezidente Repúblika halo renovasaun Estadu Emerjénsia, ne’ebé permite atu suspende direitu sirkulasaun internasionál no fiksasaun rezidénsia no rezisténsia nian,” Ministru Fidelis relata hafoin ramata reuniaun ezekutivu iha Palásiu Governu, kuarta ne’e.

Portavós Governu ne’e dehan, atu restrinje ema nia dereitu fundamentál hodi kontribui ba medida distansiamentu sosiál no prevene moras COVID-19, lei de’it la to’o tenke halo medida hirak ne’ebé maka só bele halo liuhosi deklarasaun EE.

Bazeia ba dadus hodi Ministériu Saúde (MS), númeru kazu konfirmadu COVID-19 iha Timor-Leste, hahú marsu 2020 to’o agora hamutuk 52, hosi númeru ne’e na’in-47 rekuperadu ona no na’in-lima sei baixa hela iha sala izolamentu.

Enkuantu, to’o oras ne’e iha Timor-Leste seidauk rejista ema mate tanba COVID-19.

Kazu konfirmadu ne’ebé mosu iha Timór hanesan kazu importadu, maski seidauk rejista transmisaun iha komunidade, maibé Governu liuhosi MS kontinua aplika regra rigór tanba númeru kazu iha nasaun viziñu aumenta ba bebeik.

Timór Osidentál, Indonézia ne’ebé besik ho pontu entrada terrestre ho Timor-Leste, to’o oras ne’e rejista ona kazu konfirmadu hamutuk 3.152, rekuperadu 1.759 no mate 90.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here