Xefe Estadu Maiór F-FDTL, Majór Jenerál Lere Anan Timur. Imajen Tatoli/Egas Cristovão

DILI, 20 janeiru 2021 (TATOLI)–Komandu FALINTIL-Forsa Defeza Timor-Leste (F-FDTL) sei halo promosaun diviza ba komandante no membru sira iha selebrasaun anivérsariu F-FDTL, iha 02 fevereiru 2021.

Xefe Estadu Maiór FALINTIL-Forsa Defeza Timor-Leste (F-FDTL), Majór Jenerál Lere Anan Timor dehan, prosesu atu halo promosaun ba komandante no soldadu sira aprezenta ona liuhusi proposta ba Governu no agora hein de’it desizaun hosi Prezidente Repúblika.

“Proposta ba promosaun diviza ne’e ami hato’o ona ba Governu no sei haruka mai Prezidente Repúblika mak depois sei anúnsia,” Lere ba jornalista iha Palásiu Prezidente Nicolau Lobato, Bairru Pité, Dili, kuarta ne’e.

Kona-ba lista promosaun diviza ba komandante inklui membru sira, nia seidauk bele fó-sai, tanba sei iha prosesu identifikasaun.

Serimónia promosaun diviza ne’e parte Komandu F-FDTL halo ona preparasaun no sei hasai konvite ba eis Komandante En-Xefe FALINTIL, Kay Rala Xanana Gusmão, veteranu sira hotu, eis titulár sira, membru Governu, Prezidente Repúblika no konvidadu sira seluk atu partisipa.

Iha parte seluk, Lere informa mós ba Prezidente Lú Olo kona-ba prosesu rekrutamentu ba membru F-FDTL na’in-600 sei hala’o iha marsu ka abríl 2021.

Nia hatutan, tuir loloos, prosesu rekrutamentu ne’e hala’o tiha ona iha tinan kotuk, maibé tanba Orsamentu Jerál Estadu (OJE) 2020 xumbadu iha Parlamentu Nasionál entaun afeta mós ba prosesu rekutamentu.

Komandu F-FDTL no Ministériu Defeza rasik, antes ne’e fahe ona formuláriu hamutuk rihun ba teritóriu Timor-Leste nune’e kandidatu forsa sira prenxe tuir kritériu ne’ebé fó-sai ona.

Komandante Lere mós preokupa daudaun ne’e Komandu F-FDTL menus lojístika ba ekipamentu hanesan farda militár, inklui kilat ba forsa foun seidauk iha.

“Agora, farda laiha. Kilat no kilat-musan mós laiha. Tanba ne’e, ha’u hanoin Governu tenke kria lalais kondisaun no meiu ba fardamentu,” Lere espera.

Eis líder rezisténsia mós kestiona Kompañia Haksolok ne’ebé manán konkursu públiku hodi servisu hamutuk ho Kompañia Indonézia nian ida hodi suku farda ba F-FDTL, maibé to’o agora kompañia refere seidauk aprezenta farda ne’e.

Jornalista: Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here