Diretór Kompañia Bandido Qualidade Motór, Marito “Gambua”. Imajen Tatoli/Jogerjo Guterres

DILI, 20 janeiru 2021 (TATOLI)–Diretór Empreza Bandido Qualidade Motór, Marito Gambua rekoñese rai ne’ebé nia parte sosa iha Aldeia Lesibutak, Suku Manleuana, Postu Administrativu Dom Aleixo, Munisípiu Dili, iha sertifikadu kompletu.

Marito “Gambua” klarifika katak prosesu disputa rai ne’ebé daudaun ne’e aprezenta ba Tribunál Distritál Dili halo nia hakfodak, tanba nia rasik presta ona deklarasaun iha Ministériu Públiku nu’udar sasin.

Notísia relevante: Fa’an rai, SIKN detein autoridade Suku Manleuana

Molok sosa rai ne’e, ekipa Bandido Qualidade halo verifikasaun ba dokumentu rai nian ne’ebé hetan emite hosi Diresaun Nasionál Terra no Propriedade (DNTP), Serviço Nacional Cadastral (SNC) no hetan rekoñesimentu hosi Administradór Postu Dom Aleixo, Xefe Suku no Xefe Aldeia Manleuana hodi konsidera rai ne’e laiha problema.

Nune’e, ninia parte halo kontratu ho na’in ba rai, Júlio Gonçalves A. Barreto hodi sosa rai ho luan 4500m3 ho presu $300.000 ne’ebé transfere direta ba konta bankária na’in ba rai iha novembru 2020.

“Rai ne’e ha’u mak sosa duni ho montante $299.777, falta tan $223 hodi kompleta $300.000. Molok sosa rai ne’e, ha’u identifika uluk ona ne’ebé ha’u iha broker ida ajuda ha’u hodi trata dokumentu transaksaun sosa no fa’an,” Marito ba Agência Tatoli iha nia knaar fatin, Tasi-Tolu, Dili, kuarta ne’e.

Rai ne’ebé nia parte sosa fileira ida ho rai ne’ebé sosa hosi empreza Mauhoka, Star King, TBBI no Tinolina, besik área Mota Lesibutak, iha-ne’ebé konsideradu rai privadu no la’ós rai Estadu nian.

“Rai ne’e ha’u identifika rai privadu no dokumentu kompletu ne’ebé iha deklarasaun hosi administradór munisípiu, administradór postu, xefe suku, xefe aldeia, veteranu no populasaun sira ne’ebé hela antigu iha ne’ebá,” nia informa.

Empreza Bandido Qualidade mós prontu koopera ho Tribunál Distritál Dili hodi rezolve problema ne’e tuir dalan legál hodi hetan solusaun.

Iha parte seluk, na’in ba rai nu’udar mós suspeitu, Júlio Gonçalves A. Barreto, prontu defende rai ne’ebé nia aman hahú okupa iha tinan 1979 to’o agora.

Júlio hatutan, nia prontu koopera ho juiz sira iha tribunál hodi defene rai ne’e, tanba rai ne’e iha sertifikadu kompletu ne’ebé emite hosi DNTP.

Antes ne’e, Xefe Suku Manleuana, Jacob Tilman Soares deklara nia parte prepara ona sertifikadu na’in ba rai hodi justifika iha Tribunál Distritál Dili.

Autoridade suku ne’e rekoñese rai balun ne’ebé Governu Timor-Leste sosa iha área Merkadu Manleuana nia kotuk atu harii terminál, nia parte mak fa’an ba Governu ho sertifikadu kompletu.

Jornalista: Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here