PNDS hala’o sensibilizasaun kona-ba matadalan implementasaun programa “Uma Kbiit Laek” (UKL) nivél munisípiu ba lider komunitária no munisipál iha Munisípiu Aileu. Imajen TATOLI/ Julião de Andrade. .

AILEU, 19 janeiru 2020 (TATOLI)–Governu liuhosi Ministériu Admistrasaun Estatál (MAE) liuliu liuhosi Sekretariadu Tékniku Programa Nasionál Dezenvolvimentu Suku (ST-PNDS), ohin, hala’o sensibilizasaun  kona-ba matadalan implementasaun programa “Uma Kbiit Laek” (UKL) nivél munisípiu ba xefe suku sira hamutuk na’in-33 no reprzentante postu administrativu haat (4) iha Munisípiu Aileu.

Notísia Relevante: Semana oin, Governu sensibiliza programa konstrusaun “Uma Kbiit Laek” ba komunidade

Xefe Unidade Admistrasaun Finansa PNDS, Fortunato Godinho Amaral, hateten programa “Uma Kbiit Laek” ne’e prioridade ba iha VIII Governu Konstitusionál ne’ebé fó kompeténsia liuhosi Diploma Ministeriál 39/2020 ne’ebé mak fó kompeténsia hodi implementa ka konstrui “Uma Ba Kbiit Laek” bae ma kbiit laek sira

“Tinan ida-ne’e (2021), tuir prioridade ne’ebé mak iha ona katak ita sei hahú Implementa iha aldeia hamutuk 424 no hosi dadus ida-ne’e, ita sei konstrui uma hamutuk 1.271 ba kbiit laek sira. Hosi uma hirak ne’e, liuliu ba Munisípiu Aileu sei hetan no konstrui Uma 99 ba aldeia 33 iha Munisípiu Aileu. Implementasaun ne’e la sees hosi matadalan PNDS nian,” Fortunato Godinho Amaral hateten liuhosi programa esnsibilizasaun matadalan implementasaun programa “Uma Kbiit Laek” ba lider komunitáriu sira iha Salaun Administrasaun Munisipál Aileu.

Entretantu, Reprezentante Admistrador Postu Administrativu Aileu, Sebastião Mi-Tersa, hateten nu’udar administradór nia parte prontu atu koopera ho Governu Sentrál atu implementa prioridade VIII Governu atu konstrui “Uma Kbiit Laek” ba ema kbiit laek sira, maibé husu ba PNDS atu haree didi’ak kona-bá dadus ema kbiit laek sira nian ho loloos.

“Nu’udár administradór, ha’u koopera ho Governu sentrál maibé ha’u husu ba PNDS atu haree didi’ak kona-bá dadus ema kbiit laek sira nian ne’e ho loloos. Tanba, iha diskusaun ne’e iha lamentasaun hosi xefe suku balun tanba dadus ne’e bazea ba Sistema Rundown hosi nasional,” Sebastião Mi-Tesa hateten ba kontribuidór Agência TATOLI hafoin tuir sensibilizasaun refere.

Iha fatin hanesan, Xefe Suku Liurai, Postu Administrativu Aileu Vila, Elidias Gomes, hateten nia parte la aseita ba liafuan “kbiit laek” maibé apresia tebes ba programa ne’e tanba Governu hateten programa “Umka Kbiit Laek” ne’e hanesan programa pilotu, entaun nu’udar lider komunitária sempre koopera iha implementasaun.

“Ami la aseita ho lia fuan kbiit laek maibé ami aseita ho ema vulneravel. Maibé, hanesan xefe suku, ha’u apresia tebes ba programa ne’e tanba programa ne’e di’ak tebes. Maibé, hanesan, iha ha’u-nia suku ne’e aldeia ualu (8), se programa ne’e tinan lima )5) de’it entaun ha’u-nia aldeia tolu mak la hetan. Maibé, ohin iha diskusaun parte nasionál dehan programa pilotu entaun ami simu,” nia hateten.

Tuir sensu uma-kain (2015), Munisípiu Aileu iha Postu Asministrativu haat (4) ho ninia abitante hamutuk (uma-kain) 7,598 ho total suku hamutuk 33 no aldeia hamutuk 139. Tuir estrutura administrative, hosi total suku no aldeia hirak ne’e, iha Postu Administrativu Aileu Vila iha suku 12 no aldeia 65, Postu Administrativu Liquidoe iha suku 07 no aldeia 22, Postu Administativu Remexio iha suku 08 no aldeia 27, no Postu Administrativu Laulara iha suku 06 no aldeia 23.

Notísia Relevante: Benefisiáriu “Uma Kbiit Laek” rendementu boot, Governu konsidera la elizível

Kontribuidór: Julião de Andrade

Editór: Cancio Ximenes

HAKEREK NO HATÁN

Please enter your comment!
Please enter your name here