TDD. Imajen Tatoli /Dok

DILI, 19 janeiru 2021 (TATOLI)-Ministériu Públiku (MP) liuhosi prokuradór Renato Berenahac,  iha nia alegasaun husu ba Tribunál Distritál Dili (TDD) atu fó kastigu ba arguidu ho inisiál  ABS ne’ebé lori katana taa vítima ADQ to’o mate iha agostu 2012.

“Ministériu Públiku mantein nia akuzasaun antes ne’e hodi husu Tribunál atu aplika pena ba arguidu,” hateten prokuradór Renato Berenahac iha sala audiénsia TDD.

Advogadu privadu José Camões ne’ebé fó asisténsia legal ba arguidu hateten, liuhosi depoimentu arguidu ho sasin iha julgamentu sira liubá  parte defeza sei dúvida motivu loloos katak arguidu mak taa vítima kanek to’o mate.

Tuir kronolojia, iha agostu 2012 iha rezidénsia Dili, vítima nia oan mane ho inisiál PDQ halai ba ajuda nia aman  tanba ne’e arguidu mós halai tama ba iha uma laran  no vítima mós  duni tuir hodi arguidu foti samurai ho medida 80 cm  taa iha vítima nia kakorok halo kanek no mate iha fatin.

Konsekuénsia hosi arguidu lori samurai  taa halo vítima  hetan kanek  no ikus mai mate. Arguidu hatene katak bainhira lori katana taa vítima   bele  halo mate, maibé arguidu halo nafatin.

Arguidu halo krime ho livre, deliberada, konsentimente no hatene  katak hahalok ne’e lei bandu no kastigu tuir lei.

Arguidu hanesan autór material ba krime omisídiu simples iha artigu 138 kódigu penál Timor-Leste.

Hafoin rona tiha alegasaun parte sira Tribunál deside adia fila-fali julgamentu ne’e ba iha loron 01 fevereiru 2021, tuku 17:30 Otl, hodi rona desizaun.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here