Primeiru-Ministru, Taur Matan Ruak, konvoka enkontru ho Sekretáriu Estadu Terra no Propriedade, Mário Ximenes, iha Palásiu Governu, tersa (19/01). Imajen TATOLI/Egas Cristovão

DILI, 19 janeiru 2021 (TATOLI)–Sekretáriu Estadu Terra no Propriedade, Mário Ximenes, relata ba Primeiru-Ministru (PM), Taur Matan Ruak, relasiona ho detensaun ba Diretór Nasionál Terra no Propriedade ho inisál RM.

Governante ne’e haktuir, iha enkontru ne’e, PM husu ba Sekretáriu Estadu atu hato’o ba Diretór ne’e pasiensia no koopera ho justisa.

“Ha’u relata ba Primeiru-Ministru no fó hatene mai ha’u atu ami hotu simu realidade, fuan tenke forte atubele hasoru situasaun ne’e tanba moris iha di’ak no iha mós ladi’ak, ne’ebé mosu ona di’ak tenke simu no ladi’ak mós tenke simu,” Sekretáriu Estadu ne’e informa ba jornalista sira, hafoin hasoru malu ho Xefe Governu, iha Palásiu Governu, tersa ne’e.

Maski nune’e, membru ezekutivu ne’e prefere la ko’alia barak tanba daudaun ne’e iha hela prosesu justisa.

“Asuntu ne’e iha hela parte justisa nia liman, ha’u nein iha kompeténsia oituan atu dehan ema ne’e sala ou lae, ne’ebé ami entrega tomak ba justisa, ami-nia devér mak oinsá atu motiva funsionáriu sira atu labele hakfodak ho situasaun ne’e hodi bele presta serbisu di’ak ba institusaun Estadu,” nia esplika.

Notísia relevante: SIKN detein diretór jerál DNTP

Entretantu, iha segunda (18/01) Komandu Polísia Nasionál Timor-Leste (PNTL) liuhosi Servisu Investigasaun Kriminál Nasionál (SIKN), ezekuta mandadu Tribunál Distritál Dili (TDD) hodi halo detensaun no buska ba RM iha ninia knaar fatin, Diresaun Nasionál Terra no Propriedade (DNTP), Bebora, Dili.

Antes halo detensaun, autoridade responsável tau aljema no parte investigadór SIKN hatudu mandadu TDD ba primeiru interrogatóriu ho NUC 0077/20.GGCC.

Aleinde ne’e, parte SIKN halo mós apreensaun ba dokumentu importante sira ne’ebé liga ho servisu DNTP kona-ba prosesu regula rai Estadu.

Jornalista: Antónia Gusmão

Editora: Julia Chatarina  

HAKEREK NO HATÁN

Please enter your comment!
Please enter your name here