Sekretáriu Estadu Kooperativa, Elizário Ferreira, hamutuk ho membru Kooperativa Kréditu Uniaun Afi Saranu, halo diskusaun kona-ba asuntu kooperativa kréditu. Imajen Tatoli/Natalino Costa

LAUTÉM, 19 janeiru 2021 (TATOLI)–Sekretáriu Kooperativa Kréditu Uniaun Afi Saranu, Vasco Manuel de Jesus Freitas hateten kooperativu refere enfrenta difikuldade ba sede (edifísiu) atu halo servisu ba importánsia kooperativa ninian.

“Klaru, durante ne’e ami-nia difikuldade ida mak edifísiu, tanba agora ami sei uza edifísiu provizóriu. Maski nune’e, ami buka dalan atu halo aproximasaun ho rai-na’in sira atubele hetan fatin ruma ne’ebé bele harii edifísiu,” Vasco ba Agência Tatoli hafoin akompaña vizita Sekretáriu Estadu Kooperativa, Elizário Ferreira, iha Fuiluro, Postu Administrativu Lospalos, Munisípiu Lautém, tersa ne’e.

Nia dehan, daudaun ne’e kooperativa Afi Saranu iha ona modalidade atu harii sede.

“Ami iha ona modalidade orsamentál ne’ebé atu harii sede. Ami iha orsamentu rihun $12 atu harii sede. Iha mós osan ajuda husi Estadu ho montante rihun $8. Tanba ne’e, iha tempu badak ami bele harii duni ami-nia sede kooperativu,” nia tenik.

Dirijente kooperativa Afi Saranu ne’e hatutan, difikuldade seluk ne’ebé mak kooperativa Afi Saranu hasoru mak membru sira menus koñesimentu no falta konxiénsia, tanba bainhira sira impresta tiha orsamentu ne’ebé iha maibé susar uitoan atubele devolve lalais, iha-ne’ebé difikulta dezenvolvimentu kooperativa.

Tanba ne’e, tuir Vasco, maneira atu rezolve mak parte kooperativa Afi Saranu forma ekipa koletór hodi la’o tuir nune’e bele halo kolesaun kona-ba sira ne’ebé atraza halo pagamentu  ka abandona orsamentu ne’ebé impresta ho ninian funan ne’ebé iha.

Kooperativa Kréditu Uniaun Afi Saranu harii iha 01 dezembru 2011,  hahú  ho membru na’in 20  ho  kapitál bázika rihun $200 no ikus kapitál kooperativa ba tinan 2020 ho montante $371. 553.

Tuir nia, kooperativa ne’e halai liubá iha produtivu ne’ebé mak ho intesaun tulun membru bele impresta osan halo negósiu loke kioske, loke rental no balun harii uma.

Tanba ne’e, Vasco sujere, karik iha Estadu nia programa kona-ba formasaun nian mak propoin liu atu realiza formasaun bázika kona-ba sistema ka mekanizmu oinsá realiza ligasaun ho Kooperativa Kréditu Uniaun, nune’e  membru sira inklui dirijente sira bele koñese no komprende liután sistema administrasaun no jestaun kooperativa nian liuliu ligasaun ho orsamentu.

Nia parte agradese ba prezensa Sekoop Elizário,  ne’ebé bele mai vizita Kooperativa Kréditu Uniaun Afi Saranu, tanba hosi vizita ne’e motiva kooperativa bele dezenvolve an no la’o bá-oin di’ak liután.

Iha fatin hanesan, Sekretáriu Estadu Kooperativa, Elizário Ferreira hateten edifísiu ba kooperativa Afi Saranu ne’e importante tanba fasilita hodi halo servisu.

“Ita ko’alia kona-ba funsionamentu no sustentabilidade kooperativa, ida-ne’e presiza kondisaun edifísiu ne’ebé dignu. Tanba ne’e, ha’u husu ita-boot sira ho osan ne’ebé ita-boot sira iha, ne’e presiza tebes atu harii uma ida nune’e imi bele halo servisu ne’ebé di’ak,” governante ne’e sujere.

Elizário hatutan, kona-ba formasaun nian, nia parte anota no husu ba dirijente Afi Saranu buka tempu nune’e SEKOOP haruka nia tékniku mai fó formasaun nune’e bele kapasita sira iha tempu badak para sira entende didi’ak oinsá impresta osan, rai osan no halo jestaun ba osan.

Jornalista: Natalino Costa

Editór: Xisto Freitas 

HAKEREK NO HATÁN

Please enter your comment!
Please enter your name here