Sekretáriu Estadu Kooperativa, Elizário Ferreira, entrega produtu Cesta Bázika ba komunidade iha Suku Ailebere, Postu Administrativu Iliomar, tersa (19/01/2021). Imajen Tatoli/Natalino Costa.

LAUTÉM, 19 janeiru 2021 (TATOLI)–Komunidade Suku Ailebere, Postu Admibistrativu Iliomar, Munisípiu Lautém, hamutuk 1.832 simu produtu Cesta Bázika.

Komunidade refere simu produtu Cesta Bázika liuhusi lansamentu direta hosi Sekretáriu Estadu Kooperativa, Elizário Ferreira, iha Ailebere, tersa ne’e.

Xefe Suku Ailebere, Libernito Gomes hateten programa Cesta Bázika nu’udar pakote rekooperasaun ekonomia Timor- Leste, hafoin situasaun Covid-19.

Nia parte kongratula no sente orgullu ba Governu tanba bele fahe Cesta Bázika maski uitoan, maibé ida-ne’e maka meiu hosi Governu trata povu hanesan iha situasaun pandemia Covid.

Libernito garante sei laiha reklamasaun hosi komunidade Suku Ailebere no distribuisaun Cesta Bázika iha Ailebere sei susesu.

“Ha’u garante ha’u-nia komunidade sei simu ho di’ak sasán sira ne’ebé Estadu oferese no ida-ne’e sei fahe ho susesu,” Xefe Suku Ailebere informa.

Maski nune’e, autoridade lokál ne’e husu ba Governu labele para de’it iha Cesta Bázika, maibé bá-oin Governu buka hodi insentiva komunidade atu prodúz hahán lokál para bele aumenta produsaun iha rai-laran.

Aleinde ida-ne’e, komunidade Ailebere, Adolfo de Jesus sente kontente tanba maski Governu atribui produtu lokál ho kuantidade kiik maibé agradese tanba fó apoiu ona ba nia povu iha ámbitu Covid.

Iha fatin hanesan, Diretór Kompañia Aitula Unipessoal Lda, Silvester Maubere hateten, nu’udar empreza ne’ebé responsavél ba distribuisaun Cesta Bázika iha Postu Administrativu Iliomar garante komunidade iha suku sira Postu Administrativu Iliomar nian sei hetan produtu Cesta Bázika.

Nia dehan, produtu Cesta Bázika ne’ebé kompañia prepara mak foos kilógrama 9, mina, kafé, sabaun no seluk-seluk tan.

Entretantu, Sekretáriu Estadu Kooperativa, Elizário Ferreira haklaken programa Cesta Bázika meiu ida atu insentiva agrikultór atu prodúz liután hahán lokál.

Jornalista: Natalino Costa

Editór: Xisto Freitas

HAKEREK NO HATÁN

Please enter your comment!
Please enter your name here