Primeiru-Ministru, Taur Matan Ruak, konvoka enkontru ho Komandante Jerál PNTL, Komísariu Faustino da Costa ho Segundu Komandante, Komísariu Mateus Fernandes, iha Palásiu Governu, tersa (19/01). Imajen TATOLI/Egas Cristovão

DILI, 19 janeiru 2021 (TATOLI)—Komandu Polísia Nasionál Timor-Leste (PNTL), Komisáriu Faustino da Costa, no Segundu Komandante, Komísariu Mateus Fernandes, hasoru malu ho Primeiru-Ministru, Taur Matan Ruak, hodi ko’alia kona-ba kestaun seguransa, liuliu iha área fronteira terrestre.

Iha biban ne’e, Komisáriu Faustino da Costa, husu sidadaun atu iha konsiénsia no koopera ho parte seguransa hodi kontrola di’ak liután liña fronteira hodi evita ema tama ilegál ba territóriu nasionál, nune’e labele lori moras COVID-19.

 “Ita iha postu permanente iha fronteira, komandu aumenta ona postu balun iha fulan kotuk no sei aumenta iha tempu badak nia laran nu’udar postu vijilánsia, maibé parte ida mós halo enkontru hodi partilla informasaun ho autoridade sira iha fronteira, maibé atu dehan kestaun seguransa iha fronteira presiza ita hotu nia konsiénsia,” Komisáriu Faustino da Costa, relata hafoin ramata reuniaun ho Xefe Governu, iha Palásiu Governu, tersa ne’e.

Nia rekoñese moras COVID-19 perigu tebes, to’o sidadaun iha nasaun barak lakon vida no barak mós afetadu, tanba ne’e timor-oan sira presiza atensaun no kumpre nafatin protokulu saúde públika.

“Moras ne’e risku boot, tanba ne’e sidadaun sira ne’ebé hela besik fronteira tenke kuidadu tanba besik loos fronteira ho Indonézia. Maibé iha sorin seluk ami mós nafatin halo kooperasaun serbisu ho parte hotu hodi partilla informasaun ba komunidade katak moras ne’e risku nune’e labele halo atividade ilegál,” nia akresenta.

Daudaun ne’e, Komandu PNTL halo ona preparasaun hodi aumenta tan númeru polísia iha fronteira nune’e bele reforsa di’ak liután seguransa iha área risku ba atividade ilegál.

Governu daudaun ne’e kontinua toma medida ba pasajen ilegál sira iha fronteira terrestre, hanesan harii tan postu ualu ba Unidade Polísia Fronteira (UPF) hodi kompleta postu 30-resin ne’ebé harii ona.

Iha fronteira Maliana no Suai sei aumenta postu foun haat no Oé-cusse sei aumenta postu haat, ne’ebé prosesu konstrusaun daudaun la’o hela ho kooperasaun hosi Austrália.

Aleinde ne’e, Governu mós halo levantamentu hodi hadi’a postu sira iha fronteira, iha área Oé-cusse maka Sakato, Oésilo, Citrana, iha área Maliana maka Tunu-bibi no Mota-ain no área Suai maka Salele.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here