Inspetór Jerál bá Jogu sira, Domingos da Costa Guterres. Imajen TATOLI/Francisco Simões

DILI, 19 janeiru 2021 (TATOLI)--Tuir ajenda iha kinta (21/01) ne’e, Ministériu Turizmu, Komérsiu no Indústria (MTKI) liuhosi Inspensaun Jerál ba Jogu (IGJ, sigla portugés) asina akordu hodi atua jogu ilegál ne’ebé opera iha kapitál Dili inklui munisípiu sira.

“Iha kinta ne’e, ami sei asina entendimentu entre Inspesaun Jerál Jogu ho Komandu Jerál Polisia Nasionál Timor-Leste, atu kria ekipa konjuta ida atubele halo atuasaun ba jogu ilísitu (ilegál) sira ne’ebé daudaun hala’o iha Dili no teritórriu laran tomak,” Inspetór Jerál Jogu, Domingos da Costa Guterres, hateten iha edífisiu MTKI, Mandarin, tersa ne’e.

Notísia relevante: Empreza slot machine balun “la tau osan” garantia iha banku

MTKI liuhosi IGJ halo ona indetifikasaun ba jogu ilegál, liuliu slot machine balun ne’ebé la kumpre Diploma Ministeriál iha artigu 3 kona-ba rekizitu no artigu 4 kona-ba kapitál iha konta bankária.

“Ami identifika ona, maibé presiza seguransa ne’ebé di’ak atubele fó tulun hodi halo atuasaun ba jogu ilísitu sira ne’e,” nia akresenta.

Iha baze dadus, IGJ rejista jogu hamutuk 14 no empreza slot machine rua hanesan MTG Holding, S.A no Timor Holding, Lda.

Aleinde ne’e, modalidade lotária lima mak versaun singapura rua no versaun nasionál  tolu,  modalidade  toto bola hitu no iha raspadina rua, ne’ebé hetan ona lisensa no kontratu ho Governu ne’ebé kada fulan selu taxa no impostu ba Estadu.

“Restu husi ne’e, lubuk ida mak halo operasaun ho ilegál, maibé la kleur tan ami sei to’o ba sira nia fatin atubele hato’o informasaun ba sira oinsá bele trata lisensa tuir  dalan legál,” Inspetór Jerál ba jogu ne’e informa.

IGJ no PNTL halo atuasaun atu empreza sira ne’ebé loke jogu ilegál no la kumpre Diploma Ministeriál, tenke kumpre obrigasaun selu koima.

Tuir dekretu-lei númeru 6/2016, hatene katak iha infrasaun ne’ebé grave selu koima $10.000 to’o $20.000 no infrasaun administrativa ba sira ne’ebé legál maibé la kumpre regra ruma iha kontratu selu koima $500 to’o $10.000.

“Dadaun modalidade jogu sira ne’ebé rejistu  hanesan  lotária kada fulan selu de’it kontribuisaun sosiál ho porsentu 25% no modalidade jogu sira seluk  selu distribuisaun reseita hamutuk dahuluk 10% no kontribuisaun sosiál 15%.

Enkuantu, IGJ deteta ona operadór modalidade jogu slot machine ne’ebé hetan lisensa ona hosi Governu maibé la kumpre Diploma Ministeriál, Ministériu Turizmu, Komérsiu no Indústria (MTKI) Nú.3/2019, 06 fevereiru, liuliu iha artigu 3 kona-ba rekizitu no artigu 4 kona-ba kapitál iha konta bankária.

Tuir publikasaun Jornál Repúblika, série I, nú,5, edisaun kinta-feira, 06 fevereiru 2019, Diploma Ministeriál, nú.3/2019, 06 fevereiru, artigu 3 kona-ba rekizitu ba modalidade jogu slot machine, katak sosiedade komersiál ne’ebé tuir konkursu públiku, atu manan tenke iha garantia kapitál investimentu mínimu $10.000.000 iha banku komersiál sira iha Timor-Leste.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here