Produtu Cesta Bázika iha bote Imajen TATOLI/Antónia Gusmão

LAUTÉM, 19 janeiru 2021 (TATOLI)—Iha programa Cesta Bázika, Sekretaria Estadu (SEKoop) hanesan instituisaun implementadór ne’ebé envolve hotu iha prosesu, responsabiliza distribui ba munisípiu hitu hanesan Covalima, Aileu, Ainaro, Same, Manatuto, no Liquiçá.

Tuir Sekretáriu Estadu Kooperativa, Elizário Ferreira, prosesu distribuisaun produtu ba munisípiu hirak ne’e kuaze konklui no garante kompañia sira ne’ebé tama kontratu hanesan fornesidór sei konklui tuir tempu ne’ebé fó ona.

“Agora distribuisaun atinje ona 70%, ne’ebé SEKooop responsabliza munisípiu hitu. Lautém mós atu koklui ona, parese semana oin konklui tan postu administrativu Iliomar, iha postu administrativu Tutuala maka suku ida ka rua maka seidauk no Lospalos villa falta oituan bele konklui molok ami-nian dateline,” Sekretáriu Estadu Elizário Ferreira, dehan ba Agência TATOLI, iha Lospalos villa, tersa ne’e.

Notísia relevante: SEKoop husu kompañia fornesedór munisípiu hitu finaliza distribuisaun iha fevereiru

Loron kompañia sira termina distribuisaun Cesta Bázika iha munisípiu hitu iha fevereiru.

“Ami fó ona dateline iha loron 05 fevereiru tenke termina, informasaun dadeer ne’e ha’u simu katak Ainaro semana ne’e bele konklui ona no halo enseramentu mp simu mós informasaun katak Aileu hela de’it ona suku rua ka tolu bele konklui iha semana ne’e,  tuir mai maka Liquiçá,” nia akresenta.

Aleinde ne’e, iha munisípiu Covalima enserra ona iha 30 dezembru tinan kotuk, tanba ne’e agora SEKoop sei foku ba munisípiu neen seluk ne’ebé maioria kuaze konklui.

Biban ne’e, Sekretaria Estadu ne’e husu ba kompañia sira atu kontinua kumpre regra saúde hodi prevene kontajia COVID-19, bainhira fahe produtu.

“Liuhosi despaisu ne’ebé ami fó sai, maski distribuisaun la’o nafatin iha períodu Estadu Emerjénsia, tanba situsaun ekonómika rai-laran ho situasaun COVID-19 ita la atende ita-nia povu,  maka sira sei hetan difikuldade ekonómika. Tanba ne’e maka distribuisaun la’o nafatin maibé asegura nafatin ho regra saúde,” nia hatutan.

Pagamentu ba kompañia distributór iha prosesu nia laran

Kona-ba pagamentu ba kompañia distributór Cesta Bázika sira, agora iha prosesu hela tanba sistema foin loke iha sesta semana kotuk.

“Agora iha sistema loke ona, tenke halo pagamentu ona. Dalaruma kompanña balun lamenta iha públiku maibé kompañia rasik mós la kompleta dokumentu administrativa iha parte finansa,” Sekretáriu Estadu ne’e fó hanoin.

Biban ne’e, governante ne’e husu kompañia tenke koopera ho parte instituisaun implementadór no prenxe rekezitu.

“Labele simu invoice, ba toba depois dokumentu se maka atu trata,  sira tenke koopera malu. Ha’u bele dehan katak hosi distribuisaun Cesta Bázika ne’e hau aprende tan buat foun,” nia hatutan. 

Bazeia ba dekretu-lei númeru 48/2020, 07 outubru, kona-ba medida apoiu família, atribuisaun Cesta Bázika, operadór ekonómika lokál iha ámbitu planu rekuperasaun ekonómika no kria rejime espesiál aprovizionamentu ba efeitu, iha artigu 10 kona-ba modalidade aprovizionamentu, temi katak aprovizionametu ba akizisaun produtu Cesta Bázika realiza bazeia ba modalidade ajudikasaun direta to’o limite verba ne’ebé aloka ba entidade ajudikante ne’ebé ministériu indika ona.

Ajudikasan direta ba kompañia sira tanba natureza programa Cesta Bázika ne’e emerjénsia, tanba difísil atu hili aprovizionamentu normál tanba lori fulan-tolu to’o neen mak foin finaliza, enkuantu programa ne’e implementa ba fulan-rua no estende tan ba fulan-rua.

Aprovizionamentu realiza hosi ministériu implementadór programa hanesan Ministériu Turizmu, Komérsiu no Indústria (MTKI), Ministériu Agrikultura no Peska, SEKoop, Sekretaria Estadu Ambiente (SEA) inklui Autoridade Rejiaun Administrativa Espesiál Oé-cusse Ambeno (RAEOA).

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here