Ilustrasaun

DILI, 19 janeiru 2021 (TATOLI)-Dengue hamate labarik feto ida ho tinan sia iha HNGV (Hospitál Nasionál Guido Valadares) hafoin transferénsia husi Ospitál Referál Maubisse, Munisípiu Ainaro.

Kronolojia, tuir Diretora Servisu  Munisipál  Saúde Manufahi, Florencia Cortereal Tilman katak Kazu dengue ne’ebé afeta vítima ho tinan sia ne’e, importadu husi Maliana, Munisípiu Bobonaro. Labarik ne’e lori ba ospitál Manufahi ho kondisaun grave tanba inan-aman la lori ba konsulta lalais no hamosu raan sai ona husi ibun ho  inus mak lori  ba  halo tratamentu saúde.

Nune’e, pesoál saúde husi Manufahi transfere kedas ba Ospitál Referál Maubise no estabelesimentu ospitalár Maubise nian transfere imediata ba iha HNGV, depois loron rua la konsege salva nia vida.

“Iha semana rua liubá, iha labarik  na’in rua mak hetan  moras dengue  no iha sesta semana kotuk  aumenta tan  na’in tolu; hamutuk na’in lima (inklui ida mate) mak   Saúde Munisípiu Manufahi rejista. Agora na’in tolu ne’e,  raan sai husi inus no ibun,  ida ne’e ekipa Saúde transfere mai iha Ospitál Maubesi hodi hetan tratamentu saúde,” Diretora Florencia Cortereal Tilman informa ba Agência Tatoli via telefone, ohin.

Kazu ne’e, tuir ezekutiva ne’e katak mosu iha tinan 2021 fulan janeiru iha semana dahuluk.

Kona-ba ai-moruk, nia informa, abate inklui fomigasaun sufisiente no hahú la’o iha fulan setembru to’o agora no kontinua la’o  nafatin ba fatin  risku sira iha Munisípiu Manufahi nian.

“Promosaun sensibilizasaun ami kontinua la’o nafatin. Maibé, ida ne’e  fila fali ba konsiénsia komunidade  ida idak nian atu prevene an, hamoos uma ninin, lata mamuk sira ne’ebé iha tenki hakoi,” nia hateten.

Tuir dadus, iha 2020, Saúde Munisípiu Manufahi rejista kazu dengue hamutuk 29 maibé la rezulta ema ruma mate.

Notísia relevante:Atensaun moras dengue mosu barak iha tempu udan

Jornalista : Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here