Arsebispu Arkedioseze Metropolitana Dili, Don Virgílio do Carmo da Silva, SDB. Imajen Tatoli/ Egas Cristóvão

DILI, 19 janeiru 2021 (TATOLI)—Arsebispu Metropolitana Dili deside, Don Vigílio do Carmo da Silva SDB, hato’o ba públiku katak, hahú ohin, Igreja deside sei reativa fila-fali atividade relijioza nian hanesan baibain maibé Dioseze Maliana deside suspende misa ba públiku to’o Estadu Emerjénsia dasiak termina, tanba númeru kazu COVID-19 aumenta makaas iha Dioseze Viziñu Atambua.

Notísia Relevante: Don Virgílio apela ba sidadaun hotu obedese ba regra EE

“Igreja deside reativa fila-fali atividade relijioza nian tanba  bazea ba desizaun hosi Konsellu Ministru (KM), iha reuniaun loron sesta feira 15 janeiru 2021, ne’ebé fó sai hosi portavoz Governu no Ministru Prezidénsia Konsellu Ministru, Fidelis Manuel Leite Mangalhães, kona-ba medida foun ezekusaun Estadu Emerjénsia (EE) hodi normaliza fila-fali atividade sira hosi relijioza no kultura nian,” Don Virgílio da Silva do Carmo, SDB, hateten liuhosi komunikadu imprensa ne’ebé Agência TATOLI asesu, tersa ne’e.

Ba asuntu ne’e, Don Virgílio hateten, konsidera mós desizaun  hosi Bispu Dioseze Maliana, Don Norberto do Amaral, ne’ebé sei kontinua suspende misa ba públiku to’o Estadu Emerjénsia dasiak ne’e termina, tanba númeru kazu COVID-19 aumenta makaas iha Dioseze Vizinu Atambua no afeta mós ba komunidade relijioza nia-fatin hodi hamate ona Madre ida iha Halilulik, Belu.

“Don Norberto do Amaral ne’ebé fó hanoin katak Arkidioseze Dili dook hosi fronteira, nune’e iha posibilidade atu hala’o atividade relijioza,  tanba ne’e  konsulta ho Konsellu Episkopal Arkidioseze nian, ha’u deside atu iha Arkidioseze Dili, hahú  ohin, tersa feira 19 janeiru 2021, normaliza fali selebrassaun misa,” Don Virgílio hateten.

Don Virgílio hatutan, maske Igreja deside reativa ona atividade misa maibé nia husu ba sarani sira tenke halo tuir protokolu ka regra Ministériu Saúde (MS) no OMS nian hodi uza maskara, fase liman no distansiamentu sosiál.

Nia dehan, maske normaliza ona atividade misa maibé seidauk autoriza selebra sakramentu sira hanesan Sakramentu Baptismu, primeiru Komunhão, Krisma no Kazamentu, nune’e seidauk autoriza ba selebrasaun sira hanesan, festa padrueira no prosisaun sira.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here