Visita Sekretáriu Estadu Kooperativa, Elizário Ferreira, hamutuk ho komitiva, ba grupu kooperativa iha munisípiu Manatuto, segunda (18/01). Imajen TATOLI/Natalino Costa

MANATUTO, 18 janeiru 2021 (TATOLI)—Iha ámbitu vizita grupu kooperativa iha munisípiu Manatuto, Sekretáriu Estadu Kooperativa, Elizário Ferreira, husu ba kooperativa kréditu uniaun Domihu Hum atu formaliza-an hanesan Kooperativa loloos atubele benefisia ema hotu.

“Tinan ne’e ita foku atu hadi’a kooperativa, tanba ne’e ha’u husu ita-boot kooperativa kréditu uniaun atu formaliza-an liután liuhosi edukasaun formasaun koooperativa, ne’ebé SEKoop rasik bele ajuda imi halo ida-ne’e, nune’e ba oin bele benefisia imi, membru no ba sosiadade, se lae ba oin susar,” Sekretáriu Estadu Elizário Ferreira informa bainhira vizita kooperativa kréditu Domihu Hum, iha postu administrativu Manatuto villa, munisípiu Manatuto, segunda ne’e.

Notísia relevante: SEKoop husu Kooperativa Paulo de Jesus asegura unidade

Biban ne’e, nia husu ba membru kooperativa sira tenke hatudu espíritu kooperativizmu, nune’e bele halo operasaun ho di’ak.

“Kooperativa ne’e la’ós ema ida nia, tanba ne’e presiza hanoin kooperativa ba ema hotu, nune’e hamutuk dezenvolve kooperativa ho di’ak liután,” nia akresenta.

Iha fatin hanesan, Vise-Prezidente kooperativa Dominhu Hum, Tonico de Jesus, hateten durante ne’e hala’o atividade kooperativa.

“Ami-nia kooperativa durante ne’e fó kréditu ba ita-nia komunidade sira,” nia tenik. 

Enkuantu, daudaun ne’e membru kooperativa ne’ebé harii kuaze tinan 19 ona ne’e hamutuk 300 resin, ne’ebé membru sira hanesan peskadór no seluk tan.

“Ami durante ne’e fó sira impresta hodi hola materiál peska no ami-nia kapitál inísiu harii kooperativa ne’e ho $100.000 resin,” nia hatutan

Hafoin vizita ne’e, Sekretáriu Estadu Elizário Ferreira, hamutuk ho ninia komitiva sei vizita grupu kooperativa iha postu administrativu Vemasse, molok desloka ba munisípiu Lautém.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here