Ekipa integradu hala’o hela sensibilizasaun ba prevensaun COVID-19 iha fronteira Batugade, postu administrativu Balibo. Imajen Sentru Saúde Bobonaro.

DILI, 18 janeiru 2021 (TATOLI)— Serbisu Saúde Munisípiu Bobonaro (SSMB), oras ne’e daudaun hala’o hela sensibilizasaun liuhosi fahe informasaun bá komunidade atu labele hakat liu fronteira ho illegál, nune’e evita transmisaun COVID-19 mai Timor-Leste.

Diretór Serbisu Saúde Munisípiu Bobonaro, João Báptista Mau Cardoso hato’o asuntu ne’e bá jornalista sira, hafoin partisipa serimónia asina akordu entre Ministériu Saúde ho Uniaun Europeia no Organizasaun Mundiál Saúde ba projetu responde COVID-19, iha Palásiu Sinzas, segunda ne’e.

“Ami halo ona koordenasaun serbisu ho parte seguransa no autoridade lokál sira, kona-bá desiminasaun informasaun ba komunidade iha fronteira Batugade no Badutme’an postu administrativu Balibo. Ami halo advokasia ba líder sira oinsá evita movimentasaun illegál hosi Indonézia mai ita-nia rain, tanba kazu COVID-19 sa’e maka’as iha ita nia viziñu Atambua,’’João Báptista Mau Cardoso hateten.

Diretór ne’e hatutan, sensibilizasaun ne’e hahú ona iha meadu fulan dezembru 2020 ba área sira ne’ebé mensiona, no ekipa integradu kompostu hosi SSMB, PNTL no F-FDTL sei kontinua ba área Altolebos iha postu administrativu Lolotoe, munisípiu Bobonaro, iha semana oin.

Mekanizmu ne’ebé ekipa ne’e uza durante sensibilizasaun maka, autoridade hosi Serbisu Saúde Munisípiu Bobonaro halo kontaktu, marka loron la’o hamutuk nian, no tun direta hodi fó informasaun  ba komunidade.

Kona-ba fasilidade, João Báptista Mau Cardoso  hateten, karreta ne’ebé ekipa konjunta uza hodi aviza ba komunidade, prepara hosi Ministériu Saúde.

Tuir nia haree katak, durante sensibilizasaun komunidade fó apresiasaun no promete sei la hala’o movimentu illegál  tanba surtu COVID-19 ne’e perigu duni ba ema nia vida.

Tuir planu, ekipa ne’e sei hala’o sensibilizasaun ba komunidade iha área fronteira to’o fulan fevereiru tinan ne’e.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here