Primeiru-Ministru, Taur Matan Ruak hasoru malu ho Ministru Obra Públika, Salvador Eugênio Soares dos Reis Pires. Imajen TATOLI/Egas Cristovão

DILI, 18 janeiru 2021 (TATOLI)Ministériu Obra Públika (MOP) hahú prepara dokumentu sira hodi loke konkursu ba projetu infraestrutura sira ne’ebé sei implementa iha tinan 2021.

Relasiona ho ida ne’e, Ministru Obra Públika, Salvador Eugênio Soares dos Reis Pires, relata ona preparativu sira ba Primeiru-Ministru (PM), Taur Matan Ruak.

“Enkontru ho Primeiru-Ministru, simu orientasaun no mós relata preparativu ne’ebé agora ami hala’o hela atu halo ezekusaun orsamentu 2021. Ami ko’alia mós kona-ba investimentu sira ne’ebé sei hala’o iha tinan ne’e,” Ministru Salvador relata hafoin ramata enkontru ho Xefe Governu, iha Palásiu Governu, segunda ne’e.

Notísia relevante: Governu prevee millaun $331 ba projetu infraestrutura tinan 2021

Orientasaun ne’ebé PM fó ba Ministru Salvador mak tenke halo prepatativu ne’ebé di’ak liu hodi antesipa tempu ho koordenasaun interministeriál ba projetu sira ne’ebé iha no tenke prepara ba prosesu administrativu.

“Hanesan verifikasaun ho koordenasaun ba projetu infraestrutura sira ne’ebé mak tenke prepara no hetan aprovasaun iha Konsellu Administrasaun Fundu Infraestrutura (KAFI), nune’e prepara ona dokumentu sira hanesan termu referénsia atu nune’e bele loke konkursu,” nia akresenta.

Enkuantu, iha tinan kotuk MOP halo preparativu sira hodi haruka dokumentu ba Ministériu Planu no Ordenamentu (MPO) no Ajénsia Dezenvolvimentu Nasionál (ADN) hodi halo ona verifikasaun dokumentu sira, ne’ebé hahú loke ona konkursu no ba sira ne’ebé seidauk iha kontinua koordena.

“Projetu sira ne’ebé sei halo ho fundu infraestrutura mak estrada munisipál ho distánsia kilómetru 240, projetu estrada hamutuk 300-resin, no mós manutensaun ba estrada nasionál balun inklui projetu sira seluk,” governante ne’e informa.

Iha orsamentu 2021, Governu prevee ona orsamentu ho totál millaun $331 ne’ebé aloka iha fundu infraestrutura no kapitál dezenvolvimentu hodi finansia projetu infraestrutura ne’ebé sei implementa iha tinan ne’e.

Hosi totál orsamentu ne’e, inklui ona ho projetu tasi mane millaun $8,500, aeroportu millaun $19, 843, preparasaun dezeñu no supervizaun ba projetu foun millaun $9,441, estrada millaun $105,215, ponte millaun $4,896, no portu millaun $1,814.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here