Ministru Obra Públika, Salvador Eugênio Soares dos Reis Pires. Imajen TATOLI/Egas Cristovão

DILI, 18 janeiru 2020 (TATOLI)Governu liuhosi Ministériu Obra Públika (MOP) fó ona períodu ba abitante afetadu projetu haluan estrada Rotunda Comoro to’o Tasi-tolu ne’ebé hetan ona indemnizasaun, atu hahú hamamuk fatin konstrusaun.

“Kona-ba komunidade afetadu sira, ami-nia Diresaun Obra Públika fó ona períodu balun ba sira atu prepara-an tuir tempu, ne’ebé sira tenke kumpre evakua hosi fatin, nune’e bele fasilita prosesu konstrusaun estrada ne’e rasik,” Ministru Obra Públika, Salvador Eugênio Soares dos Reis Pires, hateten hafoin enkontru ho Primeiru-Ministru, Taur Matan Ruak, iha Palásiu Governu, segunda ne’e.

Notísia relevante: Governu indemniza ona abitante afetadu projetu estrada Tasi-tolu

Ba kestaun ne’e, MOP halo ona pagamentu etapa datoluk ba afetadu hamutuk kuaze uma-kain 160, ne’ebé iha tinan ne’e sei finaliza pagamentu finál atubele husik fatin konstrusaun.

Pagamementu indemnizasaun konstrusaun faze dahuluk to’o datoluk ba komunidade afetadu ho kálkulu hamutuk millaun $1,6.

Hafoin simu pagamentu liuhosi konta bánkaria, Governu liuhosi MOP determina tempu fulan-tolu ba abitante sira atu mobiliza husik hela fatin iha área konstrusaun.

Governu indemniza abitante afetadu bazeia ba  padraun ne’ebé define tuir tipu uma, lutu no seluk tan, inklui ba ai-horis, uza padraun ne’ebé aprova hosi Minsitériu Agrikultura no Peska iha loron 18 jullu 2014.

Governu rasik konsidera trosu ne’e importante tanba hola parte iha akordu Timor-Leste ho konsórsiu Bolloré, ne’ebé halo konstrusaun Portu Baía Tibar, katak baihira portu ne’e hahú operasaun, estrada ne’e tenke prontu ona.

Tanba ne’e, MOP ezekuta desizaun Komisaun Administrasaun Fundu Infraestutura (KAFI) hodi halo preparativu dokumentu, ne’ebé iha hela andamentu.

Entertantu, MOP no Ministériu Finansa (MF) hahú preparasaun serbisu atu aselera konstrusaun estrada protokolu rotunda Nicolau Lobato to’o iha inter-sesaun Tibar ho distánsia kilometru 1,9.

MOP husu apoiu ADB atu utiliza fundu impréstimu finansia estrada ne’ebé konsidera estratéjiku tebes ba Timor-Leste no bele fasilita movimentasaun ema ho sasán, liuliu relasiona ho operasionalizasaun Portu Tibar iha tinan 2021.

Relasiona ho dokumentu sira ne’ebé Governu submete ba ADB, daudaun banku ne’e haruka ona nia péritu hodi halo análiza no avalia prosesu preparasaun sira, tanba ADB rasik konsiente katak projetu refere importante tebes, maibé tanba situasaun COVID-19 maka dada tempu oituan ba avaliasaun dokumentu.

Antes ne’e, Governu Timor-Leste iha mós akordu ho Xina Harbour inklui parseiru sira ne’ebé daudaun ne’e halo konstrusaun ba Portu Baía Tibar, katak estrada ne’e tenke finaliza iha agostu 2021, maibé ho situasaun atuál mak bele estende to’o maiu 2022 hodi finaliza projetu refere.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here