Ministru Obra Públika, Salvador Eugênio Soares dos Reis Pires. Imajen TATOLI/Egas Cristovão

DILI, 18 janeiru  2021 (TATOLI)—Ministru Obra Públika, Salvador Eugênio Soares dos Reis Pires, no Vise Ministru Obra Públika, Nicolau Lino Freitas Belo, hamutuk ho diresaun sira inklui ajénsia ne’ebé tutela ba Ministériu Obra Públika (MOP) halo avaliasaun ba ezekusaun Orsamentu Jerál Estadu (OJE) 2020 no preparasaun ba ezekusaun OJE tinan fiskál 2021.

OJE 2021 ba MOP ho montante millaun $240,6, saláriu no vensimentu millaun $1,774, bens no servisu millaun $21,3, transferénsia públika millaun $194.4 kapitál menór $934.000 no kapitál dezenvolvimentu hamutuk millaun $22,167.

“Ami ko’alia prepativu tomak ho diresaun sira no mós órgaun autónomu sira ne’ebé tutela ba ministériu atu halo preparativu no mós halo avaliasaun ba ezekusaun 2020 nian, inklui ko’alia mós kona-ba lakuna no dezafiu sira oinsá atu hadi’a, tanba ne’e mak ami haree hamutuk iha ne’e para ita bele rezolve no fasilita ita di’ak liután ba ezekuta orsamentu 2021 nian,” Ministru Salvador, hateten liuhosi nota ne’ebé Agência Tatoli asesu iha segunda ne’e.

Prezidente Repúblika promulga ona OJE 2021 iha dezembru tinan kotuk no mós foin daudaun Konsellu Ministru aprova ona dekretu ezekusaun orsamentu tinan ne’e.

Orsamentu ne’ebé aloka ba MOP, fahe mós ba órgaun Empreza Públika (EP) sira.

“Ami presiza ezekuta no fahe mós ba órgaun autónomu Empreza Públika rua, hanesan Eletricidade de Timor-Leste (EDTL) no Bee Timor-Leste,” nia akresenta.

Aleinde ne’e, ezekutivu sira nomea ona Prezidente foun ba Bee Timor-Leste.E.P no EDTL.E.P, nune’e daudaun hahú koordenasaun ba programa no polítika bazeia ba alokasaun iha OJE 2021 atu hahú preparativu ba ezekusaun.

“Tinan ne’e, fazeadamente se ita konsege ezekuta, ita mós hahú planeamentu ba 2022 nian. Ami ko’alia mós preparativu ba investimentu ka programa sira ne’ebé mak ita atu hala’o iha tinan oin,“ governante ne’e hatutan.

Iha diskusaun, pontu krítiku liu mak preparativu atu ezekuta projetu sira liuhosi koordenasaun, verifikasaun ADN (Ajénsia Dezenvolvimentu Nasionál).

Enkontru ne’ebé realiza iha Otél Novo Turismo foin lalais ne’e, partisipa hosi diretór sira hosi Diresaun Jerál Administrasaun Finansa (DGAF), Diresaun Jerál Obra  Públika (DGOP), Diresaun Jerál Abitasaun no Urbanizmu (DGHU), Prezidente Institutu Jestaun Ekipamentu (IGE), Prezidente nomeadu EDTL no Bee Timor-Leste, inklui tékniku sira seluk.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here