Ministru Finansa, Rui Augusto Gomes. Imajen TATOLI/António Gonçalves

DILI, 18 janeiru 2021 (TATOLI)—Hafoin Governu aprova regra ezekusaun Orsamentu Jerál Estadu (OJE) 2021, maka iha loron 11 janeiru, instituisaun Estadu sira hahú ona ezekuta.

Relasiona ho ezekusaun OJE, Governu liuhosi Ministériu Finansa husu kontribuisaun sidadaun hotu atu kontribui ba prosesu ezekusaun, liuliu ba programa rekuperasaun ekonómika ne’ebé ezekutivu sira dezeña ona ba kurtu no longu prazu.

“Informa ba Primeiru-Ministru katak ezekusaun orsamentál 2021 nian hahú ona iha semana kotuk no buat hotu la’o di’ak hela, maibé ha’u só apela de’it ba públiku katak hakmatek no mai ita kontribui hamutuk atu rekupera ita-nia ekonomia hodi hala’o moris sosiedade nian ho di’ak liután,” Ministru Finansa, Rui Augosto Gomes, relata hafoin ramata reuniuan semanál ho Primeiru-Ministru (PM), Taur Matan Ruak, iha Palásiu Governu, segunda ne’e.

Notísia relevante: Hahú ohin, Governu ezekuta OJE 2021

Iha sorumutuk ne’e, governante ne’e mós aproveita informa atividade ministériu ba Xefe Governu.

“Ha’u atualiza serbisu no fo hatene katak sistema informátika jestaun finansa públika funsiona ho di’ak”, Rui komfirma.

Iha Loron 28 dezembru 2020, Prezidente Repúblika, Francisco Guterres ‘Lú Olo’ promulga OJE 2021 ho montante biliaun $1,895, foti husi reseita fundu petrolíferu biliaun $1,377 no reseita naun petrolíferu millaun $508.

Hosi totál reseita fundu petrolíferu, millaun $547 foti bazeia Rendimentu Sustentável Estimadu (RSE) no transferénsia superiór liu RSE millaun $829.

Proposta-lei OJE 2021 kompostu husi saláriu no vensimentu millaun $239,2, bens (sasán) no servisu millaun $421,49, transferénsia públika millaun $669,91, kapitál minór millaun $61,14 no kapitál dezenvolvimentu millaun $503,20.

Antes ne’e, Governu relata ona katak elaborasaun  OJE 2021 bazeia ba planu rekuperasaun ekonómika.

Iha orsamentu 2021, Governu prevee millaun $123.9 ba pakote rekuperasaun ekonómika, ho objetivu hasa’e empregu, investe nafatin iha kapitál sosiál no mós promove setór produtivu sira hodi hodi bele kontribui ba kresimentu ekonómika

 Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here