Embaixadór Koreia Súl iha Timor-Leste Kim Jeong-ho hatudu hela ezemplu oinsá uza mákina walkthrough, iha serimónia entrega ba Governu Timor-Leste iha Laboratóriu Nasionál Saúde, Bidau, segunda (18/01). Imajen Tatoli/Antonio Gonsalves.

DILI, 18 janeiru 2021 (TATOLI)– Governu Korea Súl liu hosi Ajénsia Kooperasaun Internasionál Koreana (KOICA) oferese mákina walkthrough lima ba Ministériu Saúde (MS) hodi fasilita serbisu liña frente sira ho seguru.

Mákina lima ne’e entrega direta hosi Embaixadór Korea Súl iha Timor-Leste, Kim Jeong-ho no  simu hosi Diretora Jerál Prestasaun Serbisu Saúde, Odete da Silva Viegas iha Laboratóriu Nasionál Saúde, Bidau.

“Ohin Governu Korea Súl liu hosi Embaixadór Korea apoia mákina lima ba Ministériu Saúde atu hafásil serbisu saúde nian ba prevensaun COVID-19 iha ita-nia rain. Mákina ne’e seguru ba profisionál saúde laboratóriu sira atu halo teste ba ita nia maluk sira ne’ebé mai hosi liur,’’ Diretora Jerál Prestasaun Serbisu Saúde, Odete da Silva Viegas hateten ba jornalista sira hafoin serimónia entrega, segunda ne’e.

Parte Ministériu Saúde mós planeia ona atu instala mákina lima ne’e iha fatin importante sira mak hanesan, rua sei tau iha Laboratóriu  Nasionál Saúde Bidau, ida sei tau iha kuarentena Tasi-tolu, ida sei tau iha sentru izolamentu Vera Crús no ida seluk sei tau iha Rejiaun Administrativa Espesiál Oe-cusse Ambeno (RAEOA).

”Mákina walkthrough ne’e bele apoia ona tékniku Laboratóriu Nasionál Saúde sira atu halo teste swab, tanba bainhira halo teste uza ona mákina ida ne’e, la presiza atu uza tan Ekipamentu Protesaun Pesoál,’’ Odete esplika vantajen no funsionamentu hosi mákina ne’e.

Oras ne’e daudaun, nia informa, Ministériu mós hala’o ona treinamentu ba profisionál  saúde hosi Laboratóriu Nasionál oinsa halo operasaun no uza mákina ida ne’e, tanba espasu halo teste swab ba sidadaun sira tenki hamrik dook.

”Profisionál Saúde sira mós tuir hela treinamentu oinsá uza ekipamentu ida ne’e no profisionál saúde sira hosi Laboratóriu tenki tama ba laran,” diretora ne’e subliña.

Kona-ba kualidade, nia esplika, Governu Koreana garante ba Governu Timor-Leste katak, mákina ne’e kualidade no sei dura to’o tinan rua mak foin halo manutensaun, tanba ne’e presiza fó treinamentu ba tékniku sira atu uza ho kuidadu.

Iha fatin hanesan, Embaixadór Korea Súl iha Timor-Leste Kim Jeong-ho hateten mákina ne’e hanesan marka brand nasionál Koreia nian ne’ebé sei ajuda liña frente sira atu halo sira nia serbisu ho seguru.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here