Ministra Negósiu Estranjeiru no Kooperasaun, Adaljiza Albertina Xavier Reis Magno. Imajen Tatoli/Egas Cristovão

DILI, 18 janeiru 2021 (TATOLI) – Governu liuhosi Ministériu Negósiu Estranjeiru no Kooperasaun (MNEK) halo hela koordenasaun ho Sekretaria Estadu Formasaun Profisionál no Empregu (SEFOPE) atu bele lori mate isin Tomas Pereira mai Timor-Leste.

Tomas Pereira, tinan 25, nu’udar traballadór Timor-oan ne’ebé hetan asidente ho karreta iha Tasmánia, Austrália, foin lalais ne’e.

Traballadór ne’e hosi Seasonal Worker Programme (SWP) tinan 2019 no serbisu iha kompañia Tasmanian Berries.

Notísia Relevante : Traballadór timor-oan ida hakotu iis iha Austrália tanba asidente karreta

Ministra Negósiu Estranjeiru no Kooperasaun (MNEK), Adaljiza Albertina Xavier Reis Magno, hateten MNEK  koordena ona ho SEFOPE atu bele lori fila mate isin Tomas Pereira.

“MNEK ho SEFOPE trata ona dokumentu hodi haree oinsá mak atu lori fila mate isin traballadór ne’e mai,”  Ministra Adaljiza Albertina Xavier Reis Magno, hateten ba Agéncia TATOLI, ohin, iha edifísiu Ministériu Finansas, Dili.

Matebian hosi Munisípiu Bobonaro, hela iha Dili no Governu promete bainhira fronteira loke sei lori fila mate isin mai entrega ba família hodi halo funerál.

Notísia Relevante : Polísia Austrália husu autorizasaun halo autopsia ba mate-isin traballadór timor-oan

Jornalista   : Hortencio Sanchez

Editór        : Francisco Simões

HAKEREK NO HATÁN

Please enter your comment!
Please enter your name here