Arguidu na’in-rua ho inisiál JB no NS hosi Empreza Liran TECK la'o tuituir malu iha TDD ho hatais roupa detidu. Imajen Tatoli/Nelson de Sousa

DILI, 18  janeiru 2021 (TATOLI)-Defensór Públiku, Eustáquio Guterres, ne’ebé fó asisténsia legál ba arguidu NS hosi empreza Liran TECK sei halo rekursu kontra desizaun Tribunál  Distritál Dili (TDD).

Defensór Públiku Eustáquio Guterres ne’ebé fó asisténsia legál ba arguidu sira, hateten, Ministériu Públiku (MP) akuza nia kliente ho krime Burla Informátika Agravadu. Maibé, tuir nian, krime refere la relevánsia tanba internet ne’ebé fornese ba  instituisaun Estadu balun liuhosi konkursu hosi Governu, no sosa tutan hosi operadór  telekomunikasaun balun ne’ebé eziste legal iha Timor.

Notísia Relevante : Kazu internet ilegál, jestór na’in-rua hosi Liran TECK sai arguidu

“Ho desizaun Tribunál nian aplika prizaun preventiva ba  arguidu NS iha tempu badak prazu loron 15 (sura hosi desizaun Tribunál) sei halo rekursu,” Eustáquio Guterres, informa ba Agéncia TATOLI, ohin, iha Dili.

Iha loron 15 janeiru 2021, Tribunál Distritál Dili (TDD) liuhosi desizaun julgamentu primeiru interrogatóriu, Juiza Albertina Neves, deside aplika prizaun preventiva ba arguidu NS nu’udar jerente Liran TECK   no  ba arguidu JB nu’udar diretór Liran TECK    ho medida aprezentasaun periódika.

Tribunál aplika prizaun preventiva ba arguidu NS tanba arguidu  iha koñesimentu tékniku ba IT nian hodi dada liña internet ilegál hosi li’ur mai Timor-Leste no mós hanesan sidadaun estranjeiru atu asegura iha prosesu investigasaun tuir mai.

Polísia Nasionál Timor-Leste (PNTL) liuhosi Polísia Nasionál Servisu Investigasaun Kriminál (PNSIK)  iha loron 11 janeiru 2021,  ezekuta mandadu detensaun  hosi Tribunál Distritál Díli, ho númeru NUC 0166/20 PNSIK  ba arguidu sira iha area Delta, Comoro, Dili.

PNSIK mós halo buska iha edifísiu  Liran TECK hodi rekolla evidénsia hanesan ekipamentu aparellu Vsat ka Very Small Aperture Terminal, ne’ebé simu no fornese dadus ba satélite no mós Server, ne’ebé mak uza hodi halo operasaun espesiál ba rede internet hodi fornese ba instituisaun balun.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here