Aviaun ZEESM. Imajen/twinotterarchive.

DILI, 18 janeiru 2021 (TATOLI)–Aviaun Zona Ekonomia Espesiál Sosiál Merkadu (ZEESM) fulan ida ona, desde iha dezembru 2020 to’o janeiru 2021 la halo operasaun doméstika rute Dili ba Rejiaun Administrativa Espesiál Oé-cusse Ambeno (RAEOA) bá-mai.

Adjunta Prezidente Autoridade (PA) RAEOA ba Reforsa Institusionál, Leonia Monteiro, hateten daudaun ne’e aviaun ZEESM iha hela faze manutensaun ne’ebé sei la lori tempu kleur, maibé to’o oras ne’e manutensaun seidauk bele realiza tanba sei hein ekipamentu aviaun balun hosi rai-li’ur.

“Daudaun ne’e aviaun ZEESM la halo operasaun tanba atu halo manutensaun, tékniku sira sei hein pesa aviaun ne’ebé mak sei lori hosi Darwin mai, durante ne’e aviaun la tama mai Timór ne’ebé sasán ne’e seidauk mai, kuandu mai ona presiza loron ida de’it hodi halo manutensaun,” Adjunta PA RAEOA informa ba Agência TATOLI via rede sosiál, segunda ne’e.

Nia konfirma, tuir planu aviaun ne’ebé sei tula ekipamentu manutensaun sei to’o Dili iha loron 03 fevereiru 2021 no iha loron tuir mai hahú halo manutensaun.

“Ami rona dehan fevereiru ne’e aviaun mai hosi Austrália, ne’e di’ak ba RAEOA nune’e bele fasilita ona manutensaun ba aviaun ZEESM,” nia akresenta.

Durante Estadu Emerjénsia (EE) ligadu ho COVID-19 iha Timor-Leste, pilotu sira ne’ebé mak durante ne’e lori aviaun zona espesiál ne’e fila ba sira-nia rain Canadá iha novembru 2020 no hahú semo to’o dezembru tinan kotuk.

Kona-ba orsamentu ba manutensaun, prevee ona iha orsamentu Estadu ba RAEOA.

“Osan ne’ebé sei gasta depende ba pesa ne’ebé mak sei lori hosi Darwin ma,  kuandu halo tiha manutensaun mak bele halo pagamentu tuir invoice ne’ebé tékniku aprezenta ba RAEOA,” nia esplika.

Hahú loron 04 abríl 2020, Governu deside suspende provizóriu operasaun komersiál internasionál, maibé la mensiona kona-ba voo komersiál doméstiku.

Jornalista: Antónia Gusmão

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here