Atleta, Teófilo Freitas, bainhira simu sertifikadu apresiasaun hosi Prezidente Repúblika, Francisco Guterres "Lú Olo". Imajen/Mídia PR

DILI, 18 janeiru 2021 (TATOLI) – Atleta defisiente hosi modalidade Atletizmu, Teófilo Freitas, kontinua halo preparativus liuhosi treinamentu rutina atu bele partisipa iha eventu atletizmu nasionál no internasionál iha futuru.

Nu’udar atleta profisionál, Teófilo Freitas, kontinua halo nia atividade mezmu mundu tomak, inklui Timor-Leste enfrenta hela pandemia Covid-19 no hala’o regra Estadu Emerjénsia.

Notísia Relevante : Teófilo Dedika Medalla Osan Mean Ba Timor

“Nu’udar atleta atletizmu ha’u nia servisu kada loron sempre hala’o treinamentu, hanesan halai maski ita nia nasaun aplika hela Estadu Emerjénsia,” Teófilo hateten  ba Agéncia TATOLI, ohin, liuhosi mensajen Facebook.

Nia dehan, treinamentu hanesan meiu ida hodi kontinua hametin nia espíritu ba modalidade atletizmu maski seidauk serteza iha eventu nasionál no internasionál ruma.

Teófilo Freitas hanesan atleta ba modalidade Atletizmu defisiente ne’ebé foin dala uluk hamorin Timor – Leste nia naran iha eventu internasionál no marka istória úniku iha Ázia.

Eventu internasionál ne’ebé lori Teofilo hetan medalla osan mean rua ne’e hanesan eventu ASEAN Paralímpiku hala’o iha Jakarta, Indonézia 2018. Iha ne’ebé Teófilo kompete ho atleta hosi nasaun hamutuk 43.

Jornalista   : Hortencio Sanchez

Editór        : Francisco Simões

HAKEREK NO HATÁN

Please enter your comment!
Please enter your name here