Jerente Guardamor ho inisiál EBS no Metrolink ho inisiál JJDRC partisipa iha julgamentu iha TDD, domingu 17 janeiru 2021. Imajen Tatoli/Nelson de Sousa

DILI, 17 janeiru 2021 (TATOLI)-Tribunál Distritál Dili (TDD) liuhosi desizaun julgamentu primeiru interrogatóriu, domingu ne’e, aplika Termu Identidade Rezidénsia (TIR) jerál ba  jerente  na’in-rua; ida hosi kompañia Guardamor ho inisiál EBS no ida seluk hosi kompañia Metrolink ho inisiál JJDRC.

Prosesu julgamentu primeiru interrogatóriu ne’e hala’o  hahú tuku 08:00 dadeer to’o iha tuku 12:12 Otl, hodi suspende no kontinua fila-fali iha tuku 17:40 Otl, hodi rona desizaun.

Polísia fó seguransa ba arguidu EBS ho JJDRC iha TDD, domingu 17 janeiru 2021. Imajen Tatoli/ Nelson de Sousa

Polísia Nasionál Timor-Leste (PNTL) liuhosi Servisu Investigasaun Nasionál SIKN    ezekuta mandatu detensaun hosi Tribunál Distritál Dili (TDD) ho númeru NUC 0166/20/PNSIK  iha loron 14 janeiru 2021 ba jerente Metrolink ho  inisiál JJDRC  iha edifísiu Hudi Laran no jerente  Guardamor ho inisiál   EBS iha edifísiu Guardamor, Fatuhada, Dili.

Notísia Relevante : Kazu internet ilegál, jerente Guardamor ho Metrolink mós sai arguidu

SIKN mós halo buska no apreensaun ba dokumentu balun hanesan laptop rua hosi kompañia rua ne’e no dokumentu kompañia nian.

Hafoin ne’e polísia tau kedas police line iha fatin ne’ebé deskonfia uza ba ligasaun internet hodi asegura prosesu investigasaun.

Ministériu Públiku (MP) akuza ho krime burla informátika agravadu ne’ebé previstu iha artigu 296  no krime fase osan (brankamentu kapitais) ne’ebé previstu iha artigu 313  hotu-hotu hosi kódigu penál Timor-Leste.

Advogadu Manuel Tilman ne’ebé fó asisténsia legál ba arguidu sira hateten, desizaun Tribunál nian ne’e fundamentu.

“Medida koasaun TIR jerál  sira sei aprezenta an semana ida dala-rua no sira bele fila ona ba uma,” hateten Manuel Tilman

Família no kolega sira simu argiudu EBS hafoin rona tiha rezultadu julgamentu iha TDD, domingu 17 janeiru 2021. Imajen Tatoli/Nelson de Sousa

Arguidu sira sei aprezenta aan ba estasaun polísia ne’ebé besik iha arguidu sira nia rezidénsia semana ida dala-rua.  Ho medida koasaun ne’e  sei iha investigasaun no daudaun arguidu sira sei inosente bainhira to’o julgamentu komún ba prosesu ne’e to’o iha tránzitu-julgadu mak bele hatene sala ka la’e.

Tribunál husu arguidu sira atu koopera nafatin ho parte autoridade judisiál ba prosesu  investigasaun ne’ebé Ministériu Públiku nu’udar na’in ba asaun penál sei kontinua rekolla prova sira hodi aprezenta iha TDD iha tempu tuir mai.

Prosesu julgamentu primeiru interrogatóriu ne’e prezide hosi juis prosesu Albertina Neves no Ministériu Públiku (MP) reprezenta hosi prokuradór Ambrosio Rangel, Lidia Soares  no arguidu sira hetan asisténsia legal hodi advogadu privadu Manuel Tilman.

Tuir observasaun Agéncia Tatoli nian  iha TDD hafoin rona desizaun Tribunál nian remata parte família hosi arguidu nian tanis.

Arguidu na’in-rua nia kolega emprezáriu lubuk ida mós marka prezensa iha TDD hodi hatudu sira-nia solidariedade, inklui Diretór  empreza Esperansa Timor-oan (ETO), Nilton Gusmão.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here