Abro Fernandes. Imajen/Espesiál.

DILI, 16 janeiru 2021 (TATOLI)—Liman hakarak hakuak mundu maibé liman ne’e lolo la to’o. Mehi hakarak dada-sa’e bandeira RDTL iha Singapura liuhosi eventu mundiál One Championship MMA nian maibé mehi ne’e mohu-nabeen iha anin-leten. Hanoin atu lori Timor-Leste ba mundu maibé namlele tanba de’it imigrasaun Indonézia deporta nia atu fila hikas mai Timor-Leste tanba visa (vistu) termina ona validade (expira).

Notísia Relevante: Abro Fernandes sei lori bandeira TL “figth” iha Singapura

Hakarak ka lakohi. Nune’e ka la nune’e. Lutadór Mixed Martial Arts (MMA) Lafaek Timor-Leste, Abro Fernandes, simu realidade ida-ne’e ho fuan boot no laran luak. Tanba, maske sente todan, nia tenke soe oportunidade osan-mean ne’e atu figth hasoru lutadór ka fighter mundiál hosi India, Roshan Mainam, iha 22 janieru 2021, iha eventu mundiál One Championship Coallision Courrse-2 iha Singapura ne’e, lakon leet de’it.

Hakarak tebes atu partisipa iha eventu ne’’e maibé hakarak ne’e nabeen hanesan lilin be folin laek. Hakarak atu hamorin Timor-Leste nia naran iha mundu maibé tenke simu realidade moruk be moruk tebes. Hakarak atu fila lalais mai Timor-Leste atu hanaruk visa maibé tanba pandemia COVID-19 halo areoportu sira-nia odamatan taka metin hosi rohan ba rohan.

Abro Fernandes. Imajen/Espesiál.

“Loloos, ohin (16 janeiru), ha’u aranka ba Singapura atu tuir figth hasoru lutadór MMA India, Roshan Mainam. Maibé, tanba ha’u-nia visa mate iha outubru 2020 liu ba ne’e, halo ha’u labele ba. Ba ha’u-nia fans sira iha Timor-Leste, ha’u husu dekulpa tanba ha’u labele ba tuir figth iha Singapura. Ida-ne’e, ba daruak nian, ha’u-nia viajen ba Singapura atu tuir eventu mundiál ne’e kanseladu. Ohin ne’e kansela tan, tanba imigrasaun Indonézia deporta ha’u tenke fila lalais ba Timor-Leste atu hanaruk visa,” Abro Fernandes haktuir ba Agência TATOLI liuhosi WhatsApp (WA), sábadu ne’e.

Loloos, nia laran susar uitoan maibé nia tenke fuan-boot hodi simu realidade ida-ne’e. Loloos ne’e, iha loron 12 janeiru, loron imigrasaun Indonézia deporta nia ne’e, nia esforsu aan buka kedas billete aviaun nian iha aeroportu Surakarta atu fila mai Timor-Leste. Maibé, tanba billete aviaun nian la faan no aviaun mós la semo, entaun nia tenke hamate ninia vontade ne’e moris balabu nafatin iha Solo-Java Sentrál-Indonézia hamutuk ho nia espoza ho nia oan sira to’o ohin loron.

“Bainhira ha’u iha aeroportu no hasoru daudaun imigrasun iha Surakarta, ha’u telefone kedas ba família sira iha Timor-Leste. Ha’u husu no buka hatene aeroportu Timor-Leste loke ka lae, maibé rona ba katak aeroportu TL mós taka tanba kumpre hela regra Estadu Emerjénsia dasiak nian. Tuir planu, EE ne’e sei ramata iha iha fevereiru nia hahú. Entaun, parte imigrasaun Indonézia nian hateten ba ha’u katak provizoriumente ha’u bele hela iha Indonézia, maibé bainhira aeroportu loke fali ne’e, bele ba TL hodi hanaruk ha’u-nia visa,” Abro Fernandes hateten.

Visa ne’e mate lalais tanba durante ne’e nia utiliza visa turista nian hodi kontinua nia estudu iha Solo. Tanba uza visa turista nian, entaun fó biban ba nia kada fulan neen (6) tenke hanaruk maibé tanba situasaun pandemia COVID-19 no sistema prolongada diretamente maibé afinál realidade hateten oin seluk.

Maske nia hetan biban osan-mean (konvite) atu ba tuir figth iha eventu mundiál iha Singapura, eh, nia tenke enfrenta realidade moruk ida—tenke simu karta deportasaun hosi parte imigrasaun Indonézia nian no tenke selu multa tuir regra imigrasaun nian.

Abro Fernandes. Imajen/Espesiál.

“Loloos, visa mate ne’e ha’u tenke selu multa juta Rp.70-resin maibé ha’u la konsege selu. Sira dehan, di’akliu Abro ba Timor-Leste mak tama fali mai Indonézia, minimal fulan neen (6) depende dba irektorat sentrál Imigrasaun hosi KANTOR IMIGRASI KELAS I TPI SURAKARTA fó autorizasaun.  Maibé, sira hateten, iha situasaun COVID-19 ne’e, sidadun estranjeiru sira sei hetan lisensa hela emerjénsia ne’ebé automatikamente prolongada no gratuita,” Abro Fernandes ne’ebé daudaun ne’e tama iha “peringkat 15 besar MMA” iha mundu ne’e hateten.

Quinamoko oan, Abro Fernandes, ne’ebé oras ne’e sai “eroi foun” iha desportu hodi lori Timor-Leste ba mundu ne’e, la’ós ema ida-ne’ebé fasil mout iha tristeza nia laran. Quinamoko oan ne’e, iha situasaun susar no ksolok nia laran, nia sempre hatudu hamnasa-midar hodi hatán ba realidade ne’ebé moruk ne’ebé nia hasoru. Ba ka la ba, tuir nia, ida-ne’e kestaun tempu de’it. Nune’e ka la nune’e, tuir nia, sei iha tempu ba nia atu tuir figth iha eventu mundiál MMA iha loron aban.

“Komisaun organizadora iha Singapura arrepende uitoan tanba ha’u la partispa iha figth  ne’e. Maibé, ha’u fiar katak sira sei konvida ha’u, atu tuir eventu mundiál One Championship MMA ne’ebé sira sei realiza tan,” Quinamoko-oan hosi Luro ne’e hateten.  

Jornalista: Cancio Ximenes

Editór: Agapito dos Santos  

HAKEREK NO HATÁN

Please enter your comment!
Please enter your name here