Vise Ministru Interiór, António Armindo. Imajen TATOLI/Egas Cristovao

DILI, 15 janeiru 2021 (TATOLI)–Vise Ministru Interiór (MI), António Armindo, rejeita informasaun ne’ebé espalla iha públiku katak nia hatama ona proposta atu halo ezonerasaun ba Komandate Jerál Polísia Nasionál Timor-Leste (PNTL), Komisáriu Faustino da Costa.

Relasiona ho asuntu ne’e, tuir Vise MI, úniku Ministru Interiór no atuál Primeiru-Ministru (PM), Taur Matan Ruak mak bele responde.

“Ha’u seidaun ko’alia no rona informasaun kona-ba asuntu ezonerasaun Komandante Faustino, tanba ne’e la’ós ha’u-nia kompeténsia , maibé kompeténsia Ministru nian, tanba nia aleinde asume Ministru Interiór, hanesan mós Primeiru-Ministru, tanba ne’e nia mak iha liu kompeténsia no ha’u hanesan ajuda de’it halo serbisu,” Vise Ministru relata hodi responde pergunta jornalista, hafoin ramata reuniaun ho Xefe Ezekutivu, iha Palásiu Governu, sesta ne’e.

Notísia relevante: PM Taur “la hatene” informasaun ezonera Komisáriu Faustino da Costa

Antes ne’e, Ministru Interiór, Taur Matan Ruak, deklara katak nia mós laiha koñesementu kona-ba informasaun ezonerasaun ba Komisáriu Faustino da Costa.

Iha loron 13 marsu 2019, liuhosi reuniaun Konsellu Ministru, nomea Faustino da Costa, nu’udar Komandante Jerál PNTL ba mandatu tinan-haat, hodi subtitui Julio da Costa Hornay.

Proposta rezolusaun Governu ne’e, aprezenta hosi Ministru Interiór ein ezersísiu, Filomeno da Paixão de Jesus, no simu pose iha loron tuir mai.

Antes ne’e, Faustino da Costa hanesan Segundu Komandante PNTL.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here