Stasionamentu Slot Machine. Imajen/Google

DILI, 15 janeiru 2021 (TATOLI)-Komisaun A Parlamentu Nasionál (PN) ba asuntu Justisa no Konstitusionál rekomenda ba Governu liuhosi Ministériu Turizmu, Komérsiu no Indústria (MTKI),  atu foti medida ba empreza jogu slot machine ne’ebé la kumpre rekizitu Lei ka Dekretu Governu.

Prezidente Komisaun A PN, Joaquim dos Santos. Imajen Tatoli/Egas Cristóvão

Prezidente Komisaun A, Joaquin dos Santos, hateten benefísiu hosi jogu modalidade slot machine, lotaria ho jogu tradisionál ne’e  ba interese Estadu boot tebes, tanba ne’e regra tenke aplika ho loos  labele fó marjen ba ema manobra.

Nia afirma, ba empreza ne’ebé la kumpre rekizitu sira ne’ebé iha foti sansaun tuir lei haruka no  Governu labele halimar ho situasaun sira  ne’e  ba kualkér operadór ne’ebé viola  instrumentu sira ne’ebé aplika ona.

Notísia Relevante : Empreza slot machine balun “la tau osan” garantia iha banku

“Governu tenke kontrola forte,  maibé labele fó marjen ba operadór sira mafia fila-fali iha laran,” afirma  prezidente Komisaun A, Joaquim dos Santos, ba Agéncia TATOLI, ohin, iha PN.

Hatán kona-ba iha empreza slot machine balun ne’ebé la kumpre rekizitu sira, hanesan la tuir konkursu públiku ka halo adjudikasaun direita  no la  iha osan garantia  bankária ho montante $10,000,000.00 iha banku, prezidente Komisaun A ne’e hateten, ida ne’e rigor hodi kontrola.

“Ema ne’ebé kongkalinkong ka futu-lia iha laran hodi fasilita loke jogu slot machine la tuir Dekretu Governu tenke toma medida no fó sansaun,’’ Joaquin dos Santos, afirma.

Nia konsidera katak, kontribuisaun taxa ne’ebé durante ne’e MTKI liuhosi Inspetór Jerál Jogu (IGJ, sigla portugés) rekolla ba kofre Estadu hosi jogu sira ne’e seidauk másimu ho didi’ak tanba ne’e presiza  industrializa no reforsu kontrolu hodi  kobre reseita aumenta liu-tan.

Notísia Relevante : CAC halibur informasaun fiskaliza atividade jogu slot machine

Nia hatutan, Governu atu admite atividade jogu sira ne’e bele loke iha sosiedade Timor-Leste  tenke regula halo didi’ak tanba daudaun ne’e jogu sira loke livre liu-liu, oinsá ba sidadaun sira  hanesan labarik ka estudante sira mós presiza regula tanba la’ós ema  hotu asesu jogu livremente.

 Jornalista  : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here