Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, sexta (15/01). Imajen TATOLI/Egas Cristovão

DILI, 15 janeiru 2021 (TATOLI)—Governu liuhosi reuniaun Konsellu Ministru (KM) estraórdinaria, aprova ona revogasaun Rezolusaun Governu nian númeru 52/2020, loron 30 dezembru, ne’ebé aprova renovasaun impozisaun serka sanitária iha Rejiaun Administrativa Espesiál Oé-cusse Ambeno (RAEOA).

“Haree ba rekuperasaun infetadu COVID-19 iha RAEOA no la rejista tan kazu transmisaun komunitária, maka Governu deside suspende serka sanitária no permite filafali deslokasaun sira liuhosi terrestre no tasi, entre rejiaun espesiál ne’e no munisípiu seluk,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu iha Palásiu Governu, sesta ne’e.

Notísia relevante: Governu bandu deslokasaun RAEOA bá munisípiu seluk to’o 18 janeiru

Antes ne’e, iha reuniaun KM deside bandu deslokasaun hosi RAEOA ba fatin seluk, hahú 29 dezembru to’o 02 janeiru, maibé Governu deside estende tempu tanba haree ba kazu konfirmadu COVID-19 tolu ne’ebé maka deteta iha Oé-cusse no halo hela tratamentu intensivu iha sala izolamentu RAEOA.

Portavós Governu ne’e afirma, maski autoriza hikas deslokasaun hosi Oé-cusse ba munisípiu seluk no mai kapitál nasaun (Dili), maibé postu fronteira sira ho Indonézia kontinua taka, tanba haree ba kazu infetadu COVID-19 iha Timór Osidentál ne’ebé aumenta ba beibeik.

Aleinde ne’e, parte Ministériu Saúde (MS) nia haree ba rekursu, posível atu halo teste swab iha Oé-cusse atu iha serteza liután kona-ba númeru loloos moras ninian, maibé la signifika Oé-cusse nafatin iha serka sanitáriu.

“Kona-ba sidadaun sira hosi Oé-cusse atu halo deslokasaun mai Dili ho ró, regra la eziji atu limita númeru ema, maibé parte ró maka bele dehan tanba depende ba kapasidade ró, maibé kuandu sa’e ró karik tenke uza máskara no kumpre medida prevensaun COVID-19 sira seluk,” Governante ne’e  esklarese.

Estadu Emerjénsia (EE) iha faze da-siak ne’e sei abranje iha territóriu nasionál tomak no hahú vigora hosi tuku 00:00 loron 03 janeiru 2021 to’o tuku 23:59 loron 01 fevereiru 2021.

Jornalista: Antónia Gusmão

Editora: Julia Chatarina  

HAKEREK NO HATÁN

Please enter your comment!
Please enter your name here