Vise Ministru Interiór, António Armindo. Imajen TATOLI/ Egas Cristovao

DILI, 15 janeiru 2021 (TATOLI)–Governu halo ona desizaun koletiva, kompostu Ministériu Interiór (MI), Ministériu Negosiu Estranjeiru no Kooperasaun (MNEK), no Ministériu Saúde (MS), hodi lori timor-oan na’in-56 iha hosi Timór Osidentál, Atambua.

Relasiona ho asuntu ne’e, Vise Ministru Interiór, António Armindo, relata ba Primeiru-Ministru no Ministru Interiór, Taur Matan Ruak.

“Ha’u mai hasoru Primeiru-Ministru hodi ko’alia kona-ba atu lori timor-oan na’in-56 ne’ebé mak daudaun ne’e hela provizóriu iha Konsuladu Timor-Leste iha Atambua, ami iha koordenasaun di’ak ho MNEK no MS, ne’ebé ami deside ona katak sei loke fronteira úniku ba sira iha oras ida iha loron 20 fulan ne’e hodi lori sira tama mai,” Vise Ministru relata ba jornalista sira hafoin ramata enkontru ho Xefe Ezekutivu, iha Palásiu Governu, sesta ne’e.

Notísia relevante: Timoroan 56 hela iha Konsuladu TL iha Atambua

Maski nune’e, Governu nafatin husu ba timor-oan hirak ne’e atu la’o tuir dalan no kumpre nafatin protokolu saúde públika nian, nune’e labele lori risku ba país laran.

“Sidadaun hirak ne’e sei kumpre loron 14 iha kuarentena ne’ebé Governu prepara ona,” nia akresenta.

Abitante sira ne’e hela iha Konsuladu Atambua hahú kedas iha loron 24 dezembru 2020 to’o agora, ne’ebé labele hala’o viajen mai Timor-Leste tanba fronteira taka.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here