Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, sexta (15/01). Imajen TATOLI/Egas Cristovão

DILI, 15 janeiru 2020 (TATOLI)–Haree ba rekuperasaun infetadu COVID-19 no laiha kazu transmisaun komunitária, maka Governu liuhosi reuniaun Konsellu Ministru (KM) estraordinária delibera ona hodi revoga Dekretu Governu númeru 21/2020 loron 30 dezembru. 

Nune’e, aprova ona projetu Dekretu Governu foun, ne’ebé aprezenta hosi Primeiru-Ministru, Taur Matan Ruak, kona-ba medida ezekusaun ba deklarasaun Estadu Emerjénsia (EE), ne’ebé efetua husi Dekretu Prezidente Repúblika númeru 73/2020, loron 30 dezembru.

Medida ne’ebé mak hatúr iha diploma ne’e mak hanesan ho Dekretu Governu  númeru 18/2020, loron 03 dezembru, ne’ebé define ona regra ezekusaun hosi deklarasaun EE antes ne’e.

Tuir Ministru Prezidénsia Konsellu Ministru, Fidelis Manuel Leite Magalhãe, Governu to’o konkluzaun katak númeru rekuperasaun boot liu kompara ho númeru moras foun no to’o agora seidauk iha infesaun komunitária, ho hanoin ne’e maka ezekutivu sira hakarak halo mamar fali ona medida EE.

Ministru Prezidénsia Konsellu Ministru, Fidelis Manuel Leite Magalhães. Imajen TATOLI/Egas Cristovão

“Dekretu ne’ebé aprova liuhosi Konsellu Ministru estraórdinaria ne’e, tama vigór loron ida hafoin publikasaun, katak iha loron 16 janeiru 2021 medida foun iha ona ninia fatin. Medida foun ne’e ho ninia implementasaun regra hanesan atividade relijioza no kultura bele normaliza filafali, maibé husu atu ita hotu iha devér koopera atu nune’e hotu-hotu bainhira bá misa ou seremónia kulturál karik, tenke iha distansiamentu no kontinua aplika nafatin medida preventiva sira,” Ministru Fidelis relata hafoin reuniaun ezekutivu iha Palásiu Governu, sesta ne’e.

Notísia relevante: EE da-siak: viola medida ezekusaun sei asume responsabilidade kriminál

Portavós Governu ne’e konsidera, medida sira importante tebes ba sidadaun hotu atu halo tuir tanba iha Indonézia, númeru moras COVID-19 aumenta ba beibeik.

“Entaun ita sei la halo mamar regra iha fronteira sira, maibé halo mamar regra iha rai-laran, no apela atu kontinua nafatin kumpre regra sira hanesan uza máskara, fase liman ho sabaun, distansiamentu sosiál, nune’e bele evita moras ne’e iha ita-nia rain,” governante ne’e fó hanoin.

Aleinde ne’e, durante períodu vijénsia EE da-siak, lisensa hotu, autorizasaun no administrativu sira seluk inklui dokumentu sira mantein válidu la haree ba ninia validade prazu.

EE iha faze da-siak ne’e abranje iha territóriu nasionál tomak no hahú vigora hosi tuku 00:00 loron 03 janeiru 2021 to’o tuku 23:59 loron 01 fevereiru 2021.

Governu foti medida rigór iha EE da-siak tanba kazu konfirmadu COVID-19 iha fulan dezembru 2020 aumenta ba 18, maibé daudaun pasiente infetadu kuaze rekuperadu no hela de’it neen maka sei baixa iha sala izolamentu.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here