DILI, 14 janeiru 2021 (TATOLI)—Tribunál Rekursu notifika Parlamentu Nasionál lideradu Aniceto Longuinhos Guterres Lopes kona-ba legalidade Orsamentu Jerál Estadu (OJE) ba tinan fiskál 2021.
Tribunál Rekursu notifika Prezidente Parlamentu Nasiontál hodi fó resposta ba pedidu Bankada Congresso Nacional de Reconstrução de Timorense (CNRT).
Iha notifikasaun ne’e, Tribunál Rekursu husu Prezidente Parlamentu Nasionál, Deputadu Aniceto Guterres, atu responde durante loron 30 nia laran.
Sekretária Meza Parlamentu Nasional, Deputada Lídia Norberta dos Santos, haktuir pedidu Aniceto Guterres simu loron 12 fulan-janeiru tinan 2021.
“Iha loron 12 janeiru (loron rua liu-ba) maizumenus tuku 15.00 lorokraik, Prezidente Parlamentu Nasional hetan notifikasaun hosi Tribunal Rekursu ba fiskalizasaun konstitusionalidade kona-ba artigu balun iha lei Orsamentu Jeral Estadu 2021, ne’ebé pedidu ne’e mai hosi deputadu bankada CNRT,” Deputada Lídia dos Santos Martins, informa liuhosi konferénsia imprensa iha sala konferénsia Parlamentu Nasional, kinta ne’e.
Portavos Parlamentu Nasionál ne’e hateten, Prezidente Parlamentu realsa katak, nu’udár opozisaun deputadu CNRT sira iha direitu atu halo pedidu ba tribunál rekursu maibé tenke kontribui ba intrese Estadu.
Deputada Lídia la esplika klaru konteúdu notifikasaun ne’e, tanba prosesu pedidu ne’e la’o ho konfidensialidade ka segredu justisa.
“Ami sei la fó-sai buat ne’ebé mak agora daudaun iha hela prosesu, iha tempu sertu ita-boot sira bele asesu ba informasaun ida-ne’e. Maibé, iha hela faze ida-ne’ebé mak meza Parlamentu kumpre hela ninia dever ida tribunal husu mai ne’e,” Deputada Lídia dos Santos Martins informa.
Sekretária Meza Parlamentu Nasionál ne’e fundamenta, notifikasaun ne’e dirije ba órgaun Parlamentu Nasionál, la’ós ba pesoál Prezidente Parlamentu Nasional Aniceto Guteres, tanba pedidu ne’e prinsipal mak kestiona kona-ba artigu balun iha lei OJE tinan 2021 nian ne’ebé foin lalais aprova.
Nune’e, Prezidente Parlamentu Nasionál sei responde ho eskrita ba Tribunál Rekursu hodi esklarese preokupasaun bankada CNRT nian.
Entretantu, Vise-Xefe Bankada CNRT, Deputadu Patrocínio dos Reis Fernandes, esplika bankada CNRT hato’o pedidu ba Tribunál Rekursu halo fiskalizasaun tanba Orsamentu Jeral Estadu (OJE) tinan 2021 ne’e inkonstitusionál.
“Bankada Governu sira hateten ona orsamentu ne’e inkonstitusionál mak ami ba hatutan de’it hodi hato’o ba iha tribunál, hatete katak tribunal favór ida haree hela bankada Governu sira mak hateten iha sira-nia relatóriu no paresér komisaun nian, hatete katak Orsamentu Jeral Estadu 2021 ne’e inkonstitusionál. Ia-ne’e mak ami hodi ba hato’o,” nia dehan.
Nia afirma, bankada CNRT kestiona artigu lubuk ida iha lei Orsamentu Jeral Estadu (OJE) tinan 2021 nian.
Jornalista: Evaristo Soares Martins
Editór: Cancio Ximenes
Ami Povo Nia Preokupasaun maka Timor tenke ba oin
Ita ema kiik ne importante mak Timor Leste ba oin OGE iha para ita faan buat ruma karik ema bele hola no hetan osan.