Diretór Jerál Servisu Migrasaun Superintendente Asistente Polísia, Luis Barreto. Imajen Tatoli/Eugénio Pereira

DILI, 14 janeiru 2021 (TATOLI)- Durante 2020, Diresaun Nasionál Servisu Migrasaun (DNSM) konsege deporta imigrante ilegál na’in-57 ba sira ida-idak nia nasaun.

Imigrante hirak Migrasaun Timor-Leste deporta fila tanba identifika halo servisu ilegál iha Timor-Leste, inklui kontra Lei Migrasaun no uza vistu turista hodi hala’o servisu iha Timor-Leste.

“Iha 2020 ita halo operasaun ba sidadaun estranjeiru ne’ebé halo atividade ilegál. Ami loke prosesu hasoru sira ho baze lei mak vigora hodi obriga sira selu multa no sira ne’ebé la selu ami deporta fila na’in-57,” Diretór Jerál Servisu Migrasaun Superintendente Asistente Polísia, Luis Barreto, ohin, informa ba jornalista iha servisu fatin, Edifísiu Servisu Migrasaun, Vila-Verde, Dili.

Notísia Relevante : Monta ona kamera termografika deteta COVID-19 iha postu fronteira

Abitante hirak ne’e domina hosi traballadór Indonézia nian ne’ebé tuir lei bainhira identifika sira hala’o servisu ilegál tenke selu multa hosi $30,00 to’o $200,00 depende prosesu identifikasaun no infrasaun.

Diretór Migrasaun dehan, ba tinan 2021 sira-nia parte sei kontinua halo nafatin operasaun hodi identifika traballadór sira ne’ebé halo servisu iha kompañia privadu no internasionál tenke kumpre lei hodi servisu ho legál.

Migrasaun mós koopera nafatin ho traballadór sira ne’ebé uza vistu turista servisu iha Timor-Leste bele halo renovasaun ba sira-nia vistu turista ba vistu traballu, inklui fasilita sidadaun hirak ne’e trata sira-nia vistu estadia temporáriu no vistu autorizasaun rezidénsia.

Jornalista   : Eugénio Pereira

Editór        : Francisco Simões

 

HAKEREK NO HATÁN

Please enter your comment!
Please enter your name here