Primeiru-Ministru, Taur Matan Ruak. Imajen TATOLI/Egas Cristovão

DILI, 14 janeiru 2021 (TATOLI)--Primeiru Ministru (PM), Taur Matan Ruak, konsidera aviaun Austrália tipu VH-ILJ tun iha Aeroportu Internasionál Prezidente Nicolau Lobato, Comoro,Dili, iha loron hirak liubá  tuir regra normál.

“Iha kualker parte iha mundu, kualker aviaun ida kuandu husu autorizasaun tun iha situasaun emerjénsia ou apoiu ruma, ita presiza autoriza tun,  ne’e regra internasionál ne’ebé normál akontese mundu,” Xefe Governu hateten hafoin enkontru semanál ho Prezidente Repúblika, Francisco Guterres ‘Lú Olo’, iha Palásiu Prezidesiál, Bairro Pité, kinta ne’e.

Notísia Relevante: AACTL mak autoriza Aviaun Austrália tun iha Aeroportu Comoro

Iha tersa (12/01), tuku 17:30, aviaun ne’e hetan autorizasaun hosi Autoridade Aviasaun Sivíl Timor-Leste (AACTL, sigla portugés) atu tun emerjénsia atu enxe avtur (mina), maibé bainhira atu semo fali mosu insidente roda nakfera, ne’ebé la konsege halo viajen ba fatin destinasaun Brisbane, Austrália.

Aviaun ne’e mai ho pilotu na’in-rua, médiku rua no pasiente COVID-19 na’in-ida, ne’ebé hela iha Aeroportu Comoro.

“Entaun, ita halo medida rua, dahuluk, hasees aviaun hosi pista atu aviaun sira seluk mai tun karik bele tun, ne’ebé ita halo ona, no daruak  fó apoiu umanitáriu ba moras ne’ebé iha laran no pilotu sira,” Xefe Governu informa.

Daudaun Ministériu Saúde, Ministériu Negósiu Estranjeriu no Kooperasaun  (MNEK) no Ministériu Transporte no Komunikasaun  (MTK) inklui Ministériu Interiór (MI) halo esforsu  atu fó apoiu másimu atu aviaun bele kontinua viajen bá Brisbane.

“Ha’u espera katak sira nia situasaun ne’e rezolve ona, atu nune’e sira bele fila,” nia akresenta.

Kona-ba Investigasaun, PM Taur dehan, informasaun ne’ebé hetan katak, molok sira atu tun ne’e husu autorizasaun, ne’ebé normál hela.

Iha sorin seluk, Ministru Transporte no Komunikasaun, José Agostinho da Silva, konsidera Governu iha responsibilidade ajuda umanitária ba aviaun VH-ILJ liuliu asegura pasajeiru sira.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here